Россиянинг Украинага кенг кўламли ҳужуми бошланганидан бери 37 минг нафарга яқин украин фуқароси бедарак йўқолди. Бу ҳақда Deutsche Welle хабар берди.
Украина Олий Радасининг Инсон ҳуқуқлари бўйича комиссари Дмитрий Лубинецга кўра, бу “кўрсаткичлар анча юқори бўлиши мумкин”. Гап ҳам ҳарбий хизматчилар, ҳам турли ёшдаги фуқаролар ҳақида кетмоқда. Омбудсман Россия 2014 йилдан бери “Украина ҳудудидан тинч аҳолини ўғирлаб келиши”ни маълум қилди.
Бедарак йўқолганлар сонини ҳисоблашда мураккаблик шундаки, Россия ҳозирда Украина ҳудудининг деярли 20 фоизини эгаллаб турибди, — деди у.
Лубинецнинг таъкидлашича, Украина Россия ҳудудида “ноқонуний ҳибсга олинган” 1700 га яқин тинч аҳолини текширишга муваффақ бўлган, уларнинг 147 нафари ватанига қайтарилган.
Украиналик болаларнинг Россияга ноқонуний депортацияси
2023 йилда Гаагадаги Халқаро жиноий суд Россия президенти Владимир Путин ва Россия президентининг болалар ҳуқуқлари бўйича комиссари Мария Лвова-Беловани оккупация қилинган Украина ҳудудидан болаларни ўғирлашда айблаб, ҳибсга олишга ордер берганди. Кремль бу айбловларни рад этади.
2023 йил март ойида Украина болаларни Россияга мажбуран депортация қилишнинг 16 мингдан ортиқ ҳолатини эълон қилган.
Украинадан Россияга олиб келинган кўплаб болалар ноқонуний равишда ҳомийлик остидаги оилаларга берилади ёки болалар уйларига жойлаштирилади, — дейилади хабарда.
Изоҳ (0)