Қозоғистон президенти Қосим-Жўмарт Тўқаев сув тошқинидан жабр кўрган фуқароларга йўналтириш учун давлат маблағларини тежашнинг қатъий режимини жорий этиш тўғрисида қарор қабул қилди.
“Президент давлат маблағларини фуқароларга йўналтириш учун тежамкорлик режимини жорий этиш тўғрисида қарор қабул қилди, шунингдек, барча жабрланганларга зарур ёрдам кўрсатилишини билдирди”, — дейилади давлат раҳбари матбуот хизмати хабарида.
Шунингдек, жабрланганларга товон пули тўланиши ҳам эълон қилинган. Бундан ташқари, уй-жойидан айрилган ёки таъмирлашга муҳтож бўлганларга маблағ ажратилади.
“Ким квартирага кўчиб ўтишни истаса, квартиралар сотиб оламиз. Ким ўз жойида қолишни истаса, улар учун намунавий уйлар қурамиз. Лекин ҳеч ким яшаш учун хавфли жойларда қолмаслиги керак. Бундай уйлар бутун ёз давомида ва қишгача қурилади, мен ҳукумат олдига келгуси ёзгача офат оқибатларини тўлиқ бартараф этиш вазифасини қўйдим”, — дея Қўстанай вилояти аҳолиси билан учрашувдаги Тўқаевнинг сўзларидан иқтибос келтирди матбуот хизмати.
Аввалроқ Қосим-Жўмарт Тўқаев Қозоғистондаги ҳозирги сув тошқинларини сўнгги 80 йилдаги энг йирик сув тошқинлари деб атаган ва қатор вилоятларда фавқулодда ҳолат эълон қилган эди. Қозоғистон Фавқулодда вазиятлар вазирлигининг сўнгги маълумотларига кўра, март ойи бошидан буён хавфли сув тошқини ҳудудларидан эвакуация қилинганлар сони 113 минг кишидан ошган, улардан деярли 40 минг нафари болалардир.
Изоҳ (0)