Туркия Миллий мудофаа вазирлиги 2 апрель куни Туркия хавфсизлик кучлари Ироқ шимолида Курдистон ишчи партиясининг олти нафар жангарисини йўқ қилганини маълум қилди. Бу ҳақда Anadolu нашри хабар берди.
Хабарда айтилишича, жангарилар Метина ва Гара ҳудудларида ҳаво кучлари томонидан нишонга олинган. Операция давомида жангари гуруҳ тўла йўқ қилинган.
“Операцияларимиз қатъият билан давом эттирилади ва минтақада охирги террорчи йўқ қилингунча тўхтамайди,” — дейилади Миллий мудофаа вазирлиги хабарида.
Курдистон ишчи партияси жангарилари Туркияда террор ҳужумлари уюштириш мақсадида кўпинча Ироқ шимолидаги чегара атрофларида ўрнашиб олади. Турк ҳукумати Ироқ шимолидаги тоғли ҳудудда доимий тарзда ҳарбий машғулотлар олиб боради.
Маълумот ўрнида, Курдистон ишчи партияси 40 йилдан кўпроқ пайтдан бери фаолият юритиб келади. Партия Туркия, АҚШ ва Европа Иттифоқи томонидан террорчи гуруҳлар рўйхатига киритилган. Фаолияти давомида Курдистон ишчи партияси Туркияда 40 минг нафардан ортиқ одам, жумладан, аёллар, болалар ва гўдаклар ўлимига сабабчи бўлган.
Изоҳ (0)