Ижтимоий тармоқларда Россия ички ишлар ходимлари Қирғизистон элчихонаси маслаҳатчиси Манас Жўлдошбековнинг хонадонига бостириб кириб, унинг оила аъзоларига тан жароҳати етказгани ҳақида маълумот тарқалди. Ҳолат юзасидан Қирғизистон Ташқи ишлар вазирлигининг Консуллик бошқармасида Россия элчихонасининг консул маслаҳатчиси А.Бурев билан учрашув бўлиб ўтди.
Қирғизистон томони элчихона ходимининг оила аъзоларига нисбатан 1961 йилдаги Дипломатик муносабатлар тўғрисидаги Вена конвенцияси қоидалари қўпол равишда бузилганини билдирди. Қирғизистон дипломатик ваколатхонасининг аккредитациядан ўтган ходимларига нисбатан бундай хатти-ҳаракатларга йўл қўйиб бўлмаслиги таъкидланди. Ҳолат юзасидан синчиклаб тергов ўтказиш ва айбдорларни имкон қадар тезроқ жавобгарликка тортишни талаб этилди.
Россиялик консул А.Бурев ушбу фактдан афсусда эканини айтди ва Россия Ташқи ишлар вазирлиги Қирғизистон томонидан расмий нота олгани, шу асосда зарур текширув ўтказилаётгани, Қирғизистон бу борада хабардор қилинишини билдирди.
Россиянинг “ВЧК-ОГПУ” Telegram канали 8 апрель куни Россия Ички ишлар вазирлигининг икки ходими Қирғизистон элчихонаси маслаҳатчиси Манас Жўлдошбековнинг Москвадаги яшаш манзилига қонунийлигини текшириш учун келганини ёзди.
“Полиция ходимлари ходимлари дипломат ва унинг оиласи хонадонига қулфни бузиб, эшикка шикаст етказиш йўли билан ноқонуний равишда кириб келгани билан бир қаторда, қўполлик билан миграция рўйхати бланкасининг ечиб олинадиган қисмини тақдим этишни талаб қилишган”, — дейилган хабарда.
Дипломат ва унинг оила аъзолари дипломатик паспорт ва дипломатик карточкаларини тақдим этганидан кейин ҳам полиция ходимлари миграция рўйхатидан ўтганлик ҳақидаги ҳужжатларни тақдим этишни агрессив тарзда талаб қилишда давом этган, натижада дипломатнинг рафиқасига тан жароҳати, вояга етмаган фарзандларига эса руҳий шикаст етказилган.
“Бугунги кунга қадар Россия Ички ишлар вазирлиги хорижий дипломатга нисбатан ноқонуний хатти-ҳаракатлар юзасидан ички текширув ўтказмаган, бу эса келажакда Марказий Осиё давлатлари дипломатларига нисбатан шу каби ҳолатларнинг олдини олиш учун тегишли чоралар кўрмасдан, ушбу ҳодисани яшириш ниятидан далолат беради”, — деб ёзган “ВЧК-ОГПУ канали.
Изоҳ (0)