Ijtimoiy tarmoqlarda Rossiya ichki ishlar xodimlari Qirg‘iziston elchixonasi maslahatchisi Manas Jo‘ldoshbekovning xonadoniga bostirib kirib, uning oila aʼzolariga tan jarohati yetkazgani haqida maʼlumot tarqaldi. Holat yuzasidan Qirg‘iziston Tashqi ishlar vazirligining Konsullik boshqarmasida Rossiya elchixonasining konsul maslahatchisi A.Buryev bilan uchrashuv bo‘lib o‘tdi.
Qirg‘iziston tomoni elchixona xodimining oila aʼzolariga nisbatan 1961-yildagi Diplomatik munosabatlar to‘g‘risidagi Vena konvensiyasi qoidalari qo‘pol ravishda buzilganini bildirdi. Qirg‘iziston diplomatik vakolatxonasining akkreditatsiyadan o‘tgan xodimlariga nisbatan bunday xatti-harakatlarga yo‘l qo‘yib bo‘lmasligi ta’kidlandi. Holat yuzasidan sinchiklab tergov o‘tkazish va aybdorlarni imkon qadar tezroq javobgarlikka tortishni talab etildi.
Rossiyalik konsul A.Buryev ushbu faktdan afsusda ekanini aytdi va Rossiya Tashqi ishlar vazirligi Qirg‘iziston tomonidan rasmiy nota olgani, shu asosda zarur tekshiruv o‘tkazilayotgani, Qirg‘iziston bu borada xabardor qilinishini bildirdi.
Rossiyaning “VCHK-OGPU” Telegram kanali 8-aprel kuni Rossiya Ichki ishlar vazirligining ikki xodimi Qirg‘iziston elchixonasi maslahatchisi Manas Jo‘ldoshbekovning Moskvadagi yashash manziliga qonuniyligini tekshirish uchun kelganini yozdi.
“Politsiya xodimlari xodimlari diplomat va uning oilasi xonadoniga qulfni buzib, eshikka shikast yetkazish yo‘li bilan noqonuniy ravishda kirib kelgani bilan bir qatorda, qo‘pollik bilan migratsiya ro‘yxati blankasining yechib olinadigan qismini taqdim etishni talab qilishgan”, — deyilgan xabarda.
Diplomat va uning oila a’zolari diplomatik pasport va diplomatik kartochkalarini taqdim etganidan keyin ham politsiya xodimlari migratsiya ro‘yxatidan o‘tganlik haqidagi hujjatlarni taqdim etishni agressiv tarzda talab qilishda davom etgan, natijada diplomatning rafiqasiga tan jarohati, voyaga yetmagan farzandlariga esa ruhiy shikast yetkazilgan.
“Bugungi kunga qadar Rossiya Ichki ishlar vazirligi xorijiy diplomatga nisbatan noqonuniy xatti-harakatlar yuzasidan ichki tekshiruv o‘tkazmagan, bu esa kelajakda Markaziy Osiyo davlatlari diplomatlariga nisbatan shu kabi holatlarning oldini olish uchun tegishli choralar ko‘rmasdan, ushbu hodisani yashirish niyatidan dalolat beradi”, — deb yozgan “VCHK-OGPU kanali.
Izoh (0)