Москвада ноқонуний миграцияга қарши кураш бўйича ўтказилган рейд давомида полиция 6 мингдан ортиқ қоидабузарликларни аниқлаб, 836 нафар ноқонуний мигрантни Россиядан чиқариб юборишга қарор қилди. Бу ҳақда мамлакат Ички ишлар вазирлиги хабар берди.
Рейд давомида хавфсизлик кучлари томонидан уй-жой сектори, улгуржи ва чакана савдо, умумий овқатланиш шохобчалари, қурилиш ва бошқа объектлардаги 10 мингдан ортиқ объект кўздан кечирилган. Натижада 6 мингдан ортиқ миграция қонунчилиги бузилиши аниқланиб, Россияда бўлиш, мамлакатга кириш қоидаларини бузиш, ноқонуний меҳнат фаолиятини амалга ошириш бўйича 4,5 мингдан ортиқ баённомалар тузилган.
“Россия Федерацияси Маъмурий жавобгарлик тўғрисидаги кодексининг 18,15-моддасига асосан 502 нафар иш берувчи жавобгарликка тортилди. Давом этаётган тадбир доирасида ИИБ ходимлари томонидан қидирувда бўлган 22 нафар шахс аниқланди. 836 нафар чет эл фуқаросини Россиядан маъмурий чиқариб юбориш тўғрисида қарор қабул қилинди”, — дейилади ИИВ хабарида.
Шунингдек, ноқонуний миграцияни ташкил этиш бўйича 192 та жиноий иш қўзғатилган. Шундан 14 таси Жиноят кодексининг 322,1-моддаси (ноқонуний миграцияни ташкил этиш), 110 таси мигрантларни сохта рўйхатга олиш ва ҳисобга қўйиш, 68 таси ҳужжатларни қалбакилаштириш билан боғлиқ.
Россияда ноқонуний муҳожирларга қарши рейдлар Crocus City Hall’да уюштирилган терактда Тожикистон фуқаролари айбланаётгандан кейин кучайган. Сўнгги маълумотларга кўра, Crocus’даги терактда 145 киши ҳалок бўлган, 550 дан ортиқ киши жароҳатланган, жавобгарликни ИШИД террорчилик ташкилоти ўз зиммасига олган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)