Исроил президенти Исаак Герцог 2 апрель куни World Central Кitchen (WCК) хайрия ташкилоти асосчиси Хосе Андресга қўнғироқ қилиб, Исроил армиясининг қасддан бўлмаган ҳужуми натижасида WCК етти нафар ходимининг фожиали ҳалок бўлгани муносабати билан ҳамдардлик билдирди, дея Deutsche Welle хабар берди.
Андрес билан телефон орқали суҳбатда Герцог ўзининг чуқур қайғусини айтиб, фожиали йўқотиш учун чин дилдан кечирим сўради, — деди Исроил президенти идораси матбуот хизмати.
Исаак Герцог воқеа атрофлича ўрганилишига ваъда берган. Х ижтимоий тармоғида эълон қилинган баёнотда Исроил раҳбари Андресга хайрия ташкилоти исроилликлар ва фаластинликларга кўрсатган ёрдами учун ҳам миннатдорчилик билдирган.
Исроил бош вазири Биньямин Нетаньяху ўз видеомурожаатида исроиллик ҳарбийларнинг Ғазода бегуноҳ одамларга “беихтиёр” зарба берганини “фожиали воқеа” деб атаган.
Уруш пайтида бундай ҳодисалар содир бўлади. Биз буни диққат билан ўрганмоқдамиз, ҳалок бўлган хорижликлар ҳукуматлари билан алоқадамиз ва бу ҳолат яна такрорланмаслиги учун ҳаракат қиламиз, — деди Нетаньяху.
WCК маълумотларига кўра, Исроил армияси WCК автомобиль колоннасига зарба берганида ташкилотнинг етти нафар аъзоси ҳалок бўлган. Автомобильлар денгиз орқали Ғазога олиб келинган 100 тонналик инсонпарварлик ёрдамини етказгандан сўнг жўнаб кетаётган бўлган.
Қурбонлар орасида Австралия, Польша ва Буюк Британия фуқаролари, шунингдек, АҚШ ва Канада фуқаролигига эга бўлган бир эркак ва бир фаластинлик бўлган.
World Central Кitchen хайрия ташкилоти АҚШда испаниялик машҳур ошпаз Хосе Андерс томонидан 2010 йилда Гаитидаги вайронкор зилзиладан кейин ташкил этилган эди. Ўшандан бери ташкилот бутун дунё бўйлаб офат ҳудудларидаги одамларни озиқ-овқат билан таъминлаб келмоқда.
Изоҳ (0)