Тошкентдаги ҳар бир маҳаллага кўчабоши, уйбоши, йўлакбоши каби ходимлар жалб қилинади

Тошкент шаҳар ҳокими Шавкат Умурзоқов бошчилигида шаҳар секторлари бошлиқлари, ҳоким ўринбосарлари, тегишли ташкилотларнинг масъулларидан иборат ишчи гуруҳ Бектемир ҳамда Мирзо Улуғбек туманларининг ҳолатини танқидий ўрганиб чиқди. Бу ҳақда пойтахт ҳокимлиги матбуот хизмати хабар берди.

Хусусан, маҳаллалар ҳудудида жалб қилувчи нуқта, озиқ-овқатлар ва сут маҳсулотлари бозорчаси, болалар учун ўйингоҳлар, оталар чойхонаси, воркаут майдончаси, соғлом турмуш тарзи учун велойўлаклар ва югуриш йўлаклари каби қулайликлар бўлиши, йўлларнинг равон ва хавфсизлиги таъминланиши, ҳудудда ҳуқуқбузарликлар ва жиноятларнинг профилактикаси изчил ташкил этилиши зарурлиги айтилган.

Шунингдек, ижтимоий ҳимояга муҳтож аҳолига тизимли ёрдам ташкил қилиниб, ишсизларнинг бандлигини таъминлаш зарурати, шу жиҳатдан, аҳолининг тадбиркорлигини ривожлантиришда банкларнинг ўрни катта экани қайд этилган. Бундан ташқари, ҳудудда истиқомат қилаётган аҳолининг сони ва рўйхатдан ўтганлигини назоратга олиш топшириғи берилган. 

“Бундан ташқари, ҳар бир маҳаллада жамоатчилик асосида кўчабоши, уйбоши, йўлакбоши каби ходимларни жалб қилиш, ишини самарали ташкил қилган ходимларни рағбатлантиришда KPI тизимини жорий қилиш кераклиги айтиб ўтилди”, — дейилади хабарда.

Шунингдек, маҳаллаларда мавжуд ноқонуний қурилмаларни бартараф этиб, уларни аҳоли учун фойдали, самарали масканларга айлантириш, кузатув камераларини ўрнатиш орқали ҳудудларда хавфсизлик даражасини ошириш муҳимлиги муҳокама қилинган.

2020 йилда “Фуқароларнинг ўзини ўзи бошқариш органлари тўғрисида”ги қонун лойиҳасининг янги таҳрири Олий Мажлис Қонунчилик палатасига киритилган эди. Янги таҳрирда кўчабоши ва уйбоши тушунчалар киритилганди:

• кўчабоши — фуқаролар йиғини ҳудудидаги кўчаларнинг географик жойлашувига қараб, аҳолининг умумий йиғилишида сайланган ва улар номидан фуқаролар йиғинида фаолият олиб борадиган, уларнинг қонуний манфаатларини ифода этадиган фуқаро;
• уйбоши — фуқаролар йиғини ҳудудидаги кўп квартирали уйларнинг географик жойлашувига қараб, аҳолининг умумий йиғилишида сайланган ва улар номидан фуқаролар йиғинида фаолият олиб борадиган, уларнинг қонуний манфаатларини ифода этадиган фуқаро.