Ўзбекистонда “маҳалла терма жамоа”лари ташкил қилинади ҳамда мактабда футбол етакчиси танлаб олинади.
Бу ҳақда “Маҳаллаларда футбол инфратузилмасини ривожлантириш ва тармоғини кенгайтириш чора-тадбирлари тўғрисидаги” Президентнинг ПҚ-136-сон қарорида кўзда тутилган.
Ҳужжатга кўра, маҳалладаги ёшлар етакчисига қўшимча вазифалар юкланади ва у футбол бўйича спорт иншоотларидан тизимли ва самарали фойдаланишини ташкил қилиб беради. Бундан ташқари ёшлар етакчиси футбол бўйича эркаклар ва аёлларнинг турли ёш тоифалари кесимидаги “маҳалла терма жамоа”ларини шакллантириш ҳамда уларни мусобақаларга тайёрлашни ташкил этади.
Президент қарорига кўра, Спорт вазири (А. Икрамов) икки ой муддатда Ўзбекистон Республикаси Президентининг 2023 йил 28 июлидаги ПҚ-245-сон қарори билан тасдиқланган “Беш ташаббус олимпиадаси” доирасида ғолиб ва совриндор бўлган ҳамда ҳудудида спорт инфратузилмаси мавжуд бўлмаган маҳаллаларда универсал, стритбол ва воркаут спорт майдончаларини 2030 йилга қадар ташкил қилишнинг умумий параметрларига қўшимча ва ўзгартиришлар киритади.
Бундан ташқари, Ўзбекистон футбол ассоицацияси, Спорт вазирлиги ва Ўзбекистон маҳаллалар уюшмаси Қорақалпоғистон Республикаси Вазирлар Кенгаши, вилоятлар ва Тошкент Шаҳар ҳокимликлари билан биргаликда 12-15 ёш тоифалари ўртасида икки босқичли “Маҳалла лигаси” ва 16-30 ёш тоифалари ўртасида уч босқичли ДХХ кубоги мусобақаларини ўтказиш тизимини йўлга қўйиши кўзда тутилган.
“Маҳалла лига”си мусобақаларида ўз иқтидорини намоён этган энг иқтидорли футболчи ёшларни саралаб олиш орқали ҳудудий футбол ва спорт мактаблари ҳамда футбол академияларига йўналтириб бориш тизми йўлга қўйилади.
Қайд этилишича, Ўзбекистон футбол ассоциацияси ҳамда Мактабгача ва мактаб таълими вазирлиги биргаликда 2024 йилдан бошлаб 8-11-синф ўқувчилари орасидан бир нафар футбол етакчисини танлаб олиш тизимини йўлга қўяди. Футбол етакчиси ўзлари таҳсил олаётган таълим муассасасининг мусобақаларда қатнашиши билан боғлиқ масалаларда спорт мактаби директорининг футболни ривожлантириш бўйича ўринбосарига кўмаклашади.
Қарорга кўра, ушбу қарорнинг ижросини самарали ташкил қилишга Спорт вазири А.Икрамов ҳамда Ўзбекистон футбол ассоцацияси раиси А.Азизов масъул қилиб белгиланган.
Изоҳ (0)