“Барселона”нинг собиқ директори Хавьер Бордас Килиан Мбаппе 2017 йилда каталонияликлар сафига ўтиши мумкин бўлгани ҳақида гапирди.
Ўша вақтда “кўк-анорранглилар” Неймарни “ПСЖ”га 222 миллион евро эвазига қўйиб юборган уларнинг Мбаппени сотиб олиш учун пули бўлган. Натижада клуб “Боруссия Д” футболчиси Усмон Дембелега эътиборини қаратган ва унга 135 миллион евро тўлаган.
“Агар мен қарор қабул қилганимда Килиан “Барса”да ўйнарди. Неймарни сотганимизда, уни сотиб олиш учун пул бор эди. Бироқ, раҳбарият Дембеле вариантини танлади.
Мен Мбаппенинг отаси билан гаплашгандим, ҳаммаси деярли ҳал бўлганди. Бир лаҳза бу трансферни амалга оширдик деб ўйлагандим”, — дейди Бордас.
Килиан Мбаппе ҳозирда “ПСЖ” футболчиси ва унинг кейинги мавсум қайси жамоада тўп суриши номаълум. Футболчининг парижликлар билан амалдаги шартномаси мавсум якунида ўз ниҳоясига етади. Катта эҳтимол билан Килиан Мадриднинг “Реал” клубига ўтиши мумкин.
Изоҳ (0)