Испания ташқи ишлар вазири Хосе Мануэл Альбарес Мадрид жорий йилнинг июлигача Фаластин давлатини тан олишини маълум қилди. Бу ҳақда Anadolu нашри хабар берди.
Вазирнинг сўзларига кўра, Испания июль ойигача, олдин президент томонидан айтиб ўтилганидек, Фаластинни суверен давлат сифатида тан олишни режалаштирмоқда. Европада бу сиёсатни қўллаб-қувватловчилар ҳам анча эканлиги айтилган.
“Испания бу борада қатъий иродага эга. Биз европалик ҳамкорларимиз, шунингдек, араб ҳамкорларимиз билан гаплашмоқдамиз”, — дейилади ташқи ишлар вазири хабарида.
Вазир Альбарес Ғазо ва Яқин Шарқда кескинлик бартараф этилгандан сўнг, маҳаллий аҳоли манфаатларини ифода этиш ва ҳудудий яхлитликни кафолатлаш учун Фаластин миллий ҳокимиятини ташкил этишни таклиф қилган. Ҳамкор давлатларни бу ҳокимиятни тан олишга тайёргарлик кўришга чақирган.
Испания расмийси келгусидаги Фаластин қандай бўлиши ҳақида фикр билдирар экан, бир қанча жиддий мулоҳазалар билдирган. Жумладан, вазирга кўра, келгусида Шарқий Қуддус ва Ғазо “махсус коридор” орқали қайта боғланиши керак. Ғазо денгиз порти орқали эркин транспорт тармоғига улана олиши керак.
“Мен Фаластиннинг янги бош вазири ва ташқи ишлар вазири Муҳаммад Мустафо билан гаплашдим. Мен унга Испаниянинг Ғазода ўт очишни тўхтатиш, гуманитар ёрдамнинг тўсиқсиз кириши ва Фаластин давлатини тан олиш бўйича қатъий иродасини етказдим. Испания тинчлик учун ҳаракат қилмоқда”, — дейилган Испания ташқи ишлар вазири Хосе Мануэл Альбареснинг баёнотида.
Изоҳ (0)