Статистика агентлиги маълумотларига кўра, мамлакатда қазиб олинаётган табиий газ ҳажми йилдан йилга қисқариб бормоқда.
Ўзбекистонда жорий йилнинг январь ва февраль ойларида жами 7,7 миллиард куб метр табиий газ қазиб олинди. Бу кўрсаткич 2023 йилнинг январь—февраль ойларидагидан 454,8 миллион куб метрга кам дегани.
Республикада ўтган йили сўнги етти йил ичидаги энг кам — 46,7 млрд метр куб газ қазиб олинганди. Бу кўрсаткич 2017 йилдаги кўрсаткичдан (56,4 млрд метр куб) 9,7 млрд куб метрга кам.
Аввалроқ “Ўзбекнефтгаз”АЖ газ қазиб олишда прогнозлари ҳажмини пасайтириб бораётгани маълум қилинганди. Компания 2023 йилда дастлаб 34,1 млрд куб метр газ қазиб олишни режалаштирган бўлса, кейинроқ бу рақам 32,2 млрд куб метрга пасайтирилган. Аммо ўтган йилда қазиб олинган газ ҳажмининг қанча улуши “Ўзбекнефтгаз” ҳиссасига тўғри келиши очиқланмади. Жорий йилги давлат дастурида белгиланишича, мазкур компания 2024 йилда 29,3 млрд куб метр, яъни ўтган йилдаги ҳажмдан деярли 3 млрд куб метр камроқ газ ишлаб чиқариши мумкин.
Ўзбекистон газ қазиб олишнинг қисқариши фонида импорт ҳажмини оширмоқда. Республика 2020 йилда хориждан 50,4 млн долларлик газ импорт қилган бўлса, 2021 йилда бу рақам 154,5 млн долларга, 2022 йилда эса 281,9 млн долларга етган. 2023 йилда эса газ импорти ҳажми қолган йиллардагига қараганда сезиларли ошиб, 694,9 млн долларга етган. Жорий йилда газ импорти ҳажми рекорд даражада ўсиши мумкин. Чунки республика январь—февраль ойларида 166,7 млн долларлик газ импорт қилди. Бу кўрсаткич 2021 йилдаги йиллик рақамлардан кўра кўпроқдир.
Изоҳ (0)