Шавкат Умурзоқов 3 апрель куни Тошкент шаҳар ҳокими лавозимига тасдиқланди.
Шавкат Мирзиёев Халқ депутатлари Тошкент шаҳри кенгашининг навбатдан ташқари сессиясида Тошкент шаҳри ҳокими лавозимига ҳоким вазифасини бажариб келаётган Шавкат Умурзоқов номзодини тавсия этди. Шаҳар ҳокимини тайинлаш масаласи овозга қўйилди. Овоз бериш натижаларига кўра, Шавкат Умурзоқов Тошкент шаҳри ҳокими этиб тасдиқланди.
Давлат раҳбари халқ вакиллари билдирган бу юксак ишонч янги ҳокимдан катта масъулият, тинимсиз меҳнат ва фидойиликни талаб қилишини таъкидлади.
Янги ҳоким ўз ўринбосарлари, туман ҳокимлари, сектор ва банк раҳбарлари, “маҳалла еттилиги” билан пойтахт аҳолиси учун муносиб шароит яратиш, инвестиция олиб келиб, янги юқори даромадли иш ўринларини кўпайтириш, шаҳарни янада обод қилиш, бир сўз билан айтганда, одамлар рози бўлиши учун янгича ёндашув асосида катта марраларни олиб, қаттиқ ишлаши кераклиги кўрсатиб ўтилди.
2018 йилдан бери пойтахтга ҳокимлик қилиб келган Жаҳонгир Ортиқхўжаев 2023 йил 16 январь куни Шавкат Мирзиёев ўтказган энергия ресурслари таъминотига доир йиғилишда қиш мавсумига лозим даражада тайёргарлик кўрмагани учун лавозимидан озод этилганди. Пойтахт ҳокими вазифасини вақтинча бажариш ҳокимнинг биринчи ўринбосари Бахтиёр Раҳмоновга юклатилганди.
2023 йил 23 март куни “Ўзавтосаноат” раиси лавозимида ишлаб келган Шавкат Умрзоқов Тошкент шаҳри ҳокими вазифасини бажарувчи этиб тайинланди. Шундан сўнг пойтахт ҳокими вазифасини вақтинча бажариб келган Бахтиёр Раҳмонов Тошкент шаҳар ҳокимининг қурилиш, коммуникацияларни ривожлантириш, экология ва кўкаламзорлаштириш масалалари бўйича биринчи ўринбосари лавозимига қайтганди.
Изоҳ (0)