Турк банклари оммавий равишда Россия банклари билан ишлашдан бош тортяпти, деб ёзмоқда “Коммерсант” газетаси молия бозори ва ташқи савдо иштирокчиларидаги манбаларга таяниб.
Нашрга кўра, турк банклари Россиянинг деярли барча кредит ташкилотлари билан корреспондентлик алоқаларини узди, шунингдек, шартномаларни расман ёпмасдан, тўловлар билан ишлашни тўхтатди. Газета манбаларидан бири турк банклари Россиядаги шўба хорижий банклар учун истисно қилганини таъкидлади.
“Коммерсант” суҳбатдошларига кўра, вазият 2023 йилнинг ёзида янада мураккаблашган, АҚШ президенти Жо Байден 22 декабрь куни Украинадаги урушда Россияга ёрдам бераётган хорижий компанияларга қарши иккиламчи санкциялар тўғрисидаги фармонни эълон қилганидан кейин эса кескин ёмонлашган. Фармон АҚШ ҳукуматига Россияга қарши санкцияларни бузган хорижий банкларни Америка молия тизимидан узиб қўйиш имконини беради.
КВТ божхона-логистика брокери президенти Юлия Шленскаянинг сўзларига кўра, “Туркиядаги банклар пауза олиб, Россиядан ва мамлакатга пул ўтказмаларини амалга оширмаяпти”.
SOTA Logistic бизнесни ривожлантириш директори Игор Чернишевнинг айтишича, “хизматлар учун тўлов ҳам қилиб бўлмайди”
“ТАСС”нинг Туркия банклари соҳасидаги манбаси 16 январь куни маълум қилишича, турк банклари Байден фармони туфайли “кутиш режимида”, чунки фармондаги сўзлар қўшимча тушунтиришлар талаб қилади.
Bloomberg Хитой давлат банклари ҳам Жо Байденнинг иккиламчи санкциялар ҳақидаги фармони туфайли Россиядан келган мижозлар билан ишлашни чеклаётганини хабар қилди. Унга кўра, Хитойнинг камида иккита банки Россиядаги бизнесини қайта кўриб чиқишга, санкцияга дучор бўлган мижозлар билан алоқаларни узишга, шунингдек, Россия ҳарбий саноатига ҳар қандай молиявий хизматлар кўрсатишни тўхтатишга қарор қилган. Кремль Bloomberg нашрига жавобан Россия Хитой билан икки томонлама муносабатларни ривожлантиришда давом этаётганини билдирди.
Изоҳ (0)