2 апрель санасида “Бунёдкор” футбол клуби жамоанинг собиқ ўйинчилари Ривалдо ва Денилсоннинг олдидаги қарздорлик бўйича келишувга эришгани бўйича хабар берилганди.
3 апрель, чоршанба куни Халқаро футбол ассоциациялари федерацияси (ФИФА) “Бунёдкор” жамоасига қўйилган трансфер тақиқи ечилгани бўйича расмий хат жўнатган. Бу ҳақида клуб матбуот хизмати маълум қилди.
Эслатиб ўтамиз, “қалдирғочлар” ФИФА низоларни ҳал қилиш палатаси ва CAS қарорига кўра, Ривалдога: 2 489 947 евро – клуб томонидан бразилиялик футболчига тўланмаган мукофот пули ҳамда йиллик 5 фоиз устама; 5 664 000 евро – шартнома бекор қилиниши сабабли товон пули ҳамда йиллик 5 фоиз бонус. 10 минг Швейцария франки – арбитраж суди жараёнида харажатлар учун товон пули тўлаб бериши керак эди.
Денилсонга эса 700 000 доллар – клуб томонидан бразилиялик футболчига тўланмаган мукофот пули ҳамда йиллик 5 фоиз устама; 400 000 доллар – келишув шартлари бузилганлиги учун товон пули ҳамда йиллик 5 фоиз бонус. 10 минг Швейцария франки – арбитраж суди жараёнида харажатлар учун товон пули тўлаши белгиланганди.
Янги келишувга кўра тўланиши лозим бўлган суммалар сезиларли кўринишда камайтирилди.
Қўшимчасига, келишилган сумма Денилсонга 2026 йилгача уч қисмга бўлиб тўланадиган бўлди. Ривалдо билан ҳисоб-китоб эса 2028 йилга қадар ҳар йили бир мартадан амалга ошириладиган бўлди.
Изоҳ (0)