Япония ҳукумати жануби-ғарбий Окинава оролларида Тайван билан боғлиқ ҳарбий инқироз юзага келган тақдирда фуқароларни ҳимоялаш учун бошпана қуриш бўйича кўрсатмаларни эълон қилди. Бу ҳақда Nikkei нашри хабар берди.
Бомбапаноҳ қуриш масаласи оролларда бундай объектлар йўқлиги ҳамда одамларни эвакуация қилиш жуда кўп вақт олиши сабабли пайдо бўлган. Ҳисоб-китобларга кўра, Тайван яқинида жойлашган Такетоми ва Ишигаки оролларидан 65 минг кишини тижорат рейсларида олиб чиқиш учун тахминан 10 кун керак бўлади.
Nikkei нашрига кўра, Тайван билан боғлиқ ҳарбий инқироз юзага келган тақдирда, бинолар остида қуриладиган иншоотлар одамларга тахминан икки ҳафта чидаш имконини беради. Бомбапаноҳларда аҳолига электр энергияси, бир киши учун кунига 3 литр сув ва бошқа зарур материаллар тақдим этилади.
Хабар қилинишича, бошпаналар десант ҳужумидан ҳам, баллистик ракеталар ва ҳаво зарбаларидан ҳам ҳимоя қила олади. Шу билан бирга, расмийлар ҳар қандай ҳарбий ҳужумдан олдин ороллар аҳолисини эвакуация қила олишларини кутмоқда. Тинчлик даврида бинолардан тўхташ жойи ва учрашув жойлари сифатида фойдаланиш режалаштирилган.
Окинава префектураси оролларида метро линиялари йўқ ва ерости иншоотлари жуда кам. 2023 йил 1 апрель ҳолатига кўра, префектурада фавқулодда ерости бошпаналари учун фақат саккизта жой ажратилган. Тайван яқинида жойлашган Сакишима ороллари маъмурлари ҳам марказий ҳукуматдан бошпана борасида ёрдам беришни сўраган.
Январь ойида Тайванда бўлиб ўтган президентлик сайловларида ХХР билан бирлашишга қарши бўлган маҳаллий ҳукмрон партия етакчиси Лай Циндэ ғалаба қозонган эди. Кейинги бир неча ой ичида Хитой етакчиси Си Цзиньпин Тайванни аннексия қилиш ҳақида бир нечта ваъдалар берган.
Изоҳ (0)