Болгария чегарасининг очилиш маросими мамлакатнинг Шенгенга қўшилиши муносабати билан София аэропортида бўлиб ўтди. Мамлакатнинг истеъфодаги бош вазири Николай Денков ва мамлакат ҳукумати аъзолари Берлиндан парвозни кутиб олишди.
“Шенген — Европа Иттифоқига аъзо бўлганимиздан кейинги энг катта муваффақият. Биз бирлаша олдик ва Европа Иттифоқи ишончини қайта тикладик. Шенген — Болгария Европа йўлидан ишонч билан кетаётганини кўрсатади”, — деди Денков маросим иштирокчиларини қутлар экан.
София аэропортига Неаполдан парвоз қилганлар паспорт назоратидан ўтмасдан чегарадан ўтган илк йўловчилар бўлишди.
“Аммо авиация хавфсизлиги қоидалари бўйича текширувлар, албатта, сақланиб қолмоқда. Паспорт керак, у йўловчининг шахсини тасдиқлаш учун самолётга чиқишда кўрсатилади”, — деди Болгария чегара полицияси директори Антон Златанов нашрга берган интервьюсида.
Унинг таъкидлашича, Болгариядаги барча аэропорт ва денгиз портларида Шенген қоидалари бўйича ишларга техник тайёргарлик кўрилган.
2023 йил 30 декабрда Европа Иттифоқи Кенгаши 2024 йил 31 мартдан бошлаб Руминия ва Болгариянинг ҳаво ва денгиз чегараларида Шенген қонунчилигини қўллашга қарор қилди. Айни пайтда икки давлат расмийлари қуруқлик орқали саёҳат қилувчилар учун ҳам паспорт назоратини бекор қилиш чораларини кўрмоқда, бунга Австрия ҳукумати қаршилик қилмоқда.
Изоҳ (0)