МBDА мудофаа компанияси Taurus ракеталарини ишлаб чиқаришни тўхтатди. Ишлаб чиқарувчи Германия ҳукуматидан саноат учун буюртмалар бўйича қарорларни тезлаштиришни талаб қилмоқда.
Германиядаги шўба корхонаси раҳбари Томас Готтшильд Taurus ракеталари энди ишлаб чиқарилмаслигини, чунки мудофаа саноати буюртмаларсиз захираларни ишлаб чиқаришга ҳақли эмаслигини таъкидлади. Airbus, BAE Systems ва Leonardo ўртасидаги қўшма корхона Taurus қанотли ракета ва Patriot ер-ҳаво ракеталарини ишлаб чиқарувчиси ҳисобланади.
Taurus мисолида бўлгани каби ишлаб чиқариш тўхтатилганда саноатимиз учун қийинчилик пайдо бўлади. Бундай ҳолларда кўпинча кичик ва ўрта компаниялар бўлган етказиб берувчиларимиз ишлаб чиқаришни тўхтатадилар, деди у.
Готтшильд шунингдек, янги буюртмалар билан етказиб берувчилар биринчи навбатда ўзларини қайта йўналтиришлари ва хом ашё билан таъминлашлари кераклигини қўшимча қилди. Бутун дунё бўйлаб портловчи моддалар хом ашёсини қўлга киритиш бўйича қийинчиликлар мавжуд.
“Мудофаа саноати ишлаб чиқариш тўхтаб қолмаслиги учун давлат буюртмаларига муҳтож. Бу таъминот занжирларини сақлаб қолиш, синов ускуналарини янгилаб туриш ва ишчиларни малакасини ошириш учун керак”, деди у.
Готтшильд Германиянинг Украинага Taurus ракеталарини етказиб бериш имкониятини сиёсий қарор деб атади. Унинг сўзларига кўра, бу ракеталар 500 километрдан ортиқ парвоз масофаси билан “кучли қаршилик кўрсатиш эффектига эга”.
“Ҳозир Украина ўзининг бошқа қурол турлари билан қаршилик кўрсатиш қобилиятини қопламоқда. Бироқ украиналиклар нуқтайи назаридан, Taurus ҳозирги вазиятда муҳим қўшимча компонент бўлар эди”, деб таъкидлади МBDА раҳбари.
Ўтган йилдан бери Украина Германиядан Taurus ракеталарини етказиб беришни бошлашни сўрамоқда.
Бу қуролларнинг Киевга берилишига асосий қаршилардан бири Германия канцлери Олаф Шольцдир. Унинг сўзларига кўра, ракеталарнинг узатилиши Украина қуролли кучларининг Россия ҳудудига ҳужумларига олиб келиши, шунингдек, Россия ва НАТО ўртасидаги уруш эҳтимолини ошириши мумкин.
Изоҳ (0)