Терапевт шифокор Мирғолиб Раҳимов юрак-қон томир касалликлари билан оғриган беморларга рўза тутиш мумкин ёки қай ҳолатларда тавсия этилмаслиги бўйича “Дарё” нашрига тушунтириш берди.
Тавсия этилмайди
Бемор юрак-қон томир касаллиги билан бир неча йил оғриб, унинг инфаркт, инсульт ва шунга ўхшаган оғир асоратларини бир ёки бир неча марта бошидан кечирган бўлса, юрагига стент қўйилган бўлса ва буларнинг асоратларини бартараф этиш чоралари кўрилган бўлса, кун давомида қон суюлтирувчи, артериал қон босимини нормаллаштирувчи ҳамда қонда ёғ ва холестерин миқдорини камайтирувчи дориларни вақтига, соатига қараб ичиб туриши керак. Бу таблеткаларни истеъмол қилмаслик, ўша оғир асоратлар яна қайталанишига олиб келиши мумкин.
Шу сабабли, бундай беморларга ёки шу каби касалликлар билан касалланиб, тузалган беморларга ҳам рўза тутиш тавсия этилмайди.
Рўза тутганда организм янада сувсизланади, дориларни вақтида қабул қилмаслик оқибатида касаллик асоратлари қайталаниши мумкин.
Тавсия этилади
Агар юрак-қон томир касалликлари енгил даражалари, I— II босқич артериал қон босими ёки ўша стенокардиянинг I— II даражалари бўлса, бу беморлар сутка давомида бир ёки икки маҳал дори қабул қилади: эрталаб оғиз ёпишдан олдин, кечқурун ифторликдан кейин. Бундай беморлар ўзларини нохуш ҳис қилса, рўза тутишни тўхтатиб, дори ичиши тавсия қилинади.
Агар ҳеч қандай нохуш ҳодиса юзага келмаса, қон босими кўтарилиши ёки юрак соҳасидаги оғриқлар, юрак-қон томир касалига хос бўлган белгилар безовта қилмаса, рўзани бемалол давом эттиришлари мумкин. Бундай беморларга рўза тутиш тавсия этилади.
Изоҳ (0)