Terapevt shifokor Mirg‘olib Rahimov yurak-qon tomir kasalliklari bilan og‘rigan bemorlarga ro‘za tutish mumkin yoki qay holatlarda tavsiya etilmasligi bo‘yicha “Daryo” nashriga tushuntirish berdi.
Tavsiya etilmaydi
Bemor yurak-qon tomir kasalligi bilan bir necha yil og‘rib, uning infarkt, insult va shunga o‘xshagan og‘ir asoratlarini bir yoki bir necha marta boshidan kechirgan bo‘lsa, yuragiga stent qo‘yilgan bo‘lsa va bularning asoratlarini bartaraf etish choralari ko‘rilgan bo‘lsa, kun davomida qon suyultiruvchi, arterial qon bosimini normallashtiruvchi hamda qonda yog‘ va xolesterin miqdorini kamaytiruvchi dorilarni vaqtiga, soatiga qarab ichib turishi kerak. Bu tabletkalarni iste’mol qilmaslik, o‘sha og‘ir asoratlar yana qaytalanishiga olib kelishi mumkin.
Shu sababli, bunday bemorlarga yoki shu kabi kasalliklar bilan kasallanib, tuzalgan bemorlarga ham ro‘za tutish tavsiya etilmaydi.
Ro‘za tutganda organizm yanada suvsizlanadi, dorilarni vaqtida qabul qilmaslik oqibatida kasallik asoratlari qaytalanishi mumkin.
Tavsiya etiladi
Agar yurak-qon tomir kasalliklari yengil darajalari, I— II bosqich arterial qon bosimi yoki o‘sha stenokardiyaning I— II darajalari bo‘lsa, bu bemorlar sutka davomida bir yoki ikki mahal dori qabul qiladi: ertalab og‘iz yopishdan oldin, kechqurun iftorlikdan keyin. Bunday bemorlar o‘zlarini noxush his qilsa, ro‘za tutishni to‘xtatib, dori ichishi tavsiya qilinadi.
Agar hech qanday noxush hodisa yuzaga kelmasa, qon bosimi ko‘tarilishi yoki yurak sohasidagi og‘riqlar, yurak-qon tomir kasaliga xos bo‘lgan belgilar bezovta qilmasa, ro‘zani bemalol davom ettirishlari mumkin. Bunday bemorlarga ro‘za tutish tavsiya etiladi.
Izoh (0)