Москвада тожикистонлик мигрантлар уйларидан чиқмасликка ҳаракат қилмоқда, чунки Crocus’даги теракт туфайли улар депортация ёки Украинага қарши урушга оммавий юборилишидан қўрқмоқда. Бу ҳақда The New York Times хабар берди.
Москва вилоятидаги ҳужумда қўлга олинган тўрт нафар гумонланувчи Тожикистондан бўлгани сабабли Россияда интернетда мигрантларга қарши чиқишлар кучайган. Ксенофобия Украинага бостириб кириш тарафдорлари ҳисобланган ҳарбий блогерларнинг оммавий саҳифаларида фаол тарқала бошлаган.
Натижада Кремль муҳожирларга нисбатан қаттиқроқ чоралар кўриш, уруш тарафдорларининг талабларини инобатга олишга ҳаракат қилмоқда. Шу билан бирга, жамиятда миллатлараро зиддият авж олишининг олдини олишга уринмоқда.
Россия ҳукумати статистикасига кўра, ўтган йили Тожикистоннинг бир миллионга яқин фуқароси Россияда меҳнат муҳожири сифатида рўйхатга олинган. Москвадаги тожикистонликлар ишлаётган озиқ-овқат корхонаси менежерининг NYT’га айтишича, бу кайфият 2000 йилларни эслатади, ўшанда Кавказдан келган мусулмонлар террор хуружлари ва Чеченистондаги урушдан кейин кенг тарқалган дискриминацияга учраган.
“Москвадаги тожикистонликлар шу қадар қўрққанки, кўчага деярли чиқишмайди”, — дейди у.
“Улар нафақат депортациядан, балки Украинадаги урушга жалб этилишидан, Россия ҳукумати тожик халқига қарши қасос сифатида уларни оммавий равишда фронтга юборишидан қўрқади”, — дейди яқинда Москвани тарк этган тожикистонлик ҳуқуқ ҳимоячиси 25 ёшли Саиданвар.
Терактлардан кейин тожикистонликлар Россияга камроқ ташриф буюрмоқда, аввал сотиб олинган чипталар қайтарилмоқда. Чипта харидлари 20-30 фоизга камайган.
Изоҳ (0)