Россия президенти Владимир Путин тожикистонлик ҳамкасби Эмомали Раҳмон билан терактни муҳокама қилди. Бу ҳақда Кремль хабар берди.
Тожикистон президенти телефон суҳбатида Москва вилоятидаги терактни қоралади. Тожикистон ва Россия терроризмга қарши биргаликда курашни давом эттириш ниятини тасдиқлади.
“Россиядаги миллий мотам вақтида давлатимиз раҳбари барча Тожикистон фуқароларининг қардош рус халқи билан бирдамлигини алоҳида таъкидлади”, — дейилади Кремль хабарида.
Суҳбат чоғида Эмомали Раҳмон “террорчиларнинг миллати, ватани, дини йўқлигини” таъкидлаган.
“Президент жабрланганларнинг тезроқ соғайиб кетишини тилаб, мудҳиш фожиада ҳалок бўлганларнинг оила аъзолари ва яқинларига чуқур ҳамдардлик билдирди”, — дейилади Тожикистон президенти матбуот хизмати хабарида.
23 март куни Москва вилоятидаги Crocus City Hall да содир этилган теракт юзасидан 11 киши қўлга олинди. ОАВда ҳибсга олинганлар орасида Тожикистон фуқаролари ҳам борлиги ҳақида маълумотлар пайдо бўлди.
Тожикистон Ташқи ишлар вазирлиги Россия расмийларидан мамлакат фуқароларининг терактга алоқадорлиги ҳақида маълумот олмаганини маълум қилди. Мамлакатнинг Россиядаги элчихонаси ватандошларини оммавий тадбирларда қатнашмасликка чақирди.
Гумонланувчилар қўлга олинган куни бир қатор Telegram каналларида Тожикистоннинг тўрт фуқароси терактда иштирок этган бўлиши мумкинлиги ҳақида хабар тарқалиб, уларнинг сурати эълон қилинди. Жумладан, Ривожиддин Исломов ва Махмадрасул Насриддиновларнинг исм-шарифлари ва фотосуратлари чоп этилди.
Кейинроқ Тожикистон Ички ишлар вазирлиги Telegram каналларидаги маълумотни рад этиб, ушбу республика фуқаролари 2023 йил 26 ноябрь куни Россиядан қайтиб келгани, теракт содир бўлган вақтда Тожикистонда яшаш жойида бўлганини маълум қилди. Республика Ички ишлар вазирлиги ҳам уларнинг паспортлар билан тушган суратларини чоп этди.
Изоҳ (0)