“Давлат таълим стандартлари ва давлат таълим талабларини ишлаб чиқиш ҳамда жорий этиш тартибини такомиллаштириш чора-тадбирлари тўғрисида”ги ҳукумат қарори қабул қилинди, деб хабар беради Telegram’даги “Ҳуқуқий ахборот” канали.
Қарор билан Давлат таълим стандартлари ва давлат таълим талабларини ишлаб чиқиш ҳамда жорий этиш тартиби тўғрисидаги низом тасдиқланди. Унга кўра, 2024 йил 1 октябргача таълим соҳасидаги атамаларнинг халқаро даражада қабул қилинган атамаларга мувофиқлигини таъминлаган ҳолда “Узлуксиз таълим тизимининг изоҳли луғати” ишлаб чиқилади.
Шунингдек, давлат таълим стандартлари, давлат таълим талаблари, ўқув режа ва дастурларини ишлаб чиқишда қуйидагилар инобатга олинади:
- тегишли таълим босқичи якунида таълим олувчиларда шаклланиши лозим бўлган компетенсияларни давлат, жамият ва меҳнат бозори талабларини инобатга олган ҳолда белгилаш;
- таълим турлари узлуксизлиги ва узвийлигини таъминлаш, мақсад ва вазифаларни таълим натижадорлигига йўналтириш;
- таълим олувчиларда атроф муҳитни асраб-авайлаш ва муқобил энергия манбаларидан самарали фойдаланиш масъулиятини шакллантириш.
Таълим натижаларининг халқаро миқёсда тан олинишини таъминлаш мақсадида Ўзбекистонда мавжуд таълим турлари UNESCO’нинг “Таълимнинг халқаро стандарт таснифлагичи” даражалари билан мувофиқлаштирилади.
2024 йил 1 августгача “dts.uz” – Давлат таълим стандартлари ва давлат таълим талабларининг ягона очиқ муҳокама портали ишга туширилади.
Аввалроқ Макроиқтисодий ва ҳудудий тадқиқотлар институти Ўзбекистондаги мактабларда таълим сифатига салбий таъсир кўрсатаётган омиллар юзасидан маълумот берганди.
Изоҳ (0)