Ўзбекистон ва Россия ўртасида олий таълим, фан ва инновациялар соҳасида ҳамкорлик алоқалари мустаҳкамланмоқда, деб хабар бермоқда Олий таълим, фан ва инновациялар вазирлиги матбуот хизмати.
Маълум қилинишича, 19 март куни вазир Қўнғиротбой Шарипов Россиянинг Ўзбекистондаги элчиси Олег Малгинов билан учрашди. Учрашувда ўзаро муносабатларда тўпланган ижобий тажрибага асосланиб, Россия университетлари билан ҳамкорликни янада кенгайтириш масаласи муҳокама қилинди.
Хусусан, Ўзбекистон–Россия таълим форуми ҳақида гапириларкан, бундай анжуманлар соҳадаги ҳамкорликни ривожлантириш масалаларини муҳокама қилиш учун муҳим майдон бўлиб хизмат қилаётгани қайд этилди.
Шунингдек, томонлар юқори технологик соҳаларда икки томонлама илмий-техник ҳамкорликка урғу берди, жумладан, Россиянинг энг йирик илмий марказларидан бири “Курчатов институти” миллий илмий маркази билан лойиҳаларни кенгайтириш масалаларини муҳокама қилди.
Қўшма илмий лойиҳалар танловини ташкил қилиш ҳамда бу мақсадда янги ҳамкорлик ҳужжатини имзолаш юзасидан фикр алмашилди.
Изоҳ (0)