“Davlat taʼlim standartlari va davlat taʼlim talablarini ishlab chiqish hamda joriy etish tartibini takomillashtirish chora-tadbirlari to‘g‘risida”gi hukumat qarori qabul qilindi, deb xabar beradi Telegram’dagi “Huquqiy axborot” kanali.
Qaror bilan Davlat taʼlim standartlari va davlat taʼlim talablarini ishlab chiqish hamda joriy etish tartibi to‘g‘risidagi nizom tasdiqlandi. Unga ko‘ra, 2024-yil 1-oktyabrgacha taʼlim sohasidagi atamalarning xalqaro darajada qabul qilingan atamalarga muvofiqligini taʼminlagan holda “Uzluksiz taʼlim tizimining izohli lug‘ati” ishlab chiqiladi.
Shuningdek, davlat taʼlim standartlari, davlat taʼlim talablari, o‘quv reja va dasturlarini ishlab chiqishda quyidagilar inobatga olinadi:
- tegishli taʼlim bosqichi yakunida taʼlim oluvchilarda shakllanishi lozim bo‘lgan kompetensiyalarni davlat, jamiyat va mehnat bozori talablarini inobatga olgan holda belgilash;
- taʼlim turlari uzluksizligi va uzviyligini taʼminlash, maqsad va vazifalarni taʼlim natijadorligiga yo‘naltirish;
- taʼlim oluvchilarda atrof muhitni asrab-avaylash va muqobil energiya manbalaridan samarali foydalanish masʼuliyatini shakllantirish.
Taʼlim natijalarining xalqaro miqyosda tan olinishini taʼminlash maqsadida O‘zbekistonda mavjud taʼlim turlari UNESCO’ning “Taʼlimning xalqaro standart tasniflagichi” darajalari bilan muvofiqlashtiriladi.
2024-yil 1-avgustgacha “dts.uz” – Davlat taʼlim standartlari va davlat taʼlim talablarining yagona ochiq muhokama portali ishga tushiriladi.
Avvalroq Makroiqtisodiy va hududiy tadqiqotlar instituti O‘zbekistondagi maktablarda taʼlim sifatiga salbiy taʼsir ko‘rsatayotgan omillar yuzasidan ma’lumot bergandi.
Izoh (0)