Ўзбекистонда аёллар иқтисодиётда эркаклар билан тенг иштирок этса, мамалакат ялпи миллий даромади 29 фоизга ошиши мумкин. Бу ҳақда Жаҳон банкининг “Ўзбекистон: мамлакатдаги гендер ҳолатини баҳолаш” ҳисоботида қайд этилган.
27 март куни Жаҳон банки Олий Мажлис Сенати, Оила ва хотин-қизлар масалалари қўмитаси, “Тараққиёт стратегияси” маркази ва Буюк Британия Ташқи ишлар, Миллатлар ҳамдўстлиги масалалари ва тараққиёт бўйича вазирлиги билан ҳамкорликдаги янги “Ўзбекистон: мамлакатдаги гендер ҳолатини баҳолаш” ҳисоботининг асосий хулосалари ва тавсияларини тақдим этди.
Ҳисоботда гендер тенглигининг асосий йўналишлари, жумладан, аёлларнинг иқтисодий фаолият ва имкониятлар, таълим тизими ва соғлиқни сақлаш хизматларидан фойдаланиш имкониятларига эътибор қаратилган. Шунингдек, унда хотин-қизларни зўравонликдан ҳимоя қилиш, никоҳ ва ажрашиш, аёлларнинг ижтимоий-сиёсий ҳаётдаги иштироки билан боғлиқ вазият ўрганилади.
Бундан ташқари, Ўзбекистонда аёлларнинг ҳуқуқлари ва уларнинг жамиятдаги ўрни ҳақидаги тасаввурга таъсир кўрсатадиган хатти-ҳаракатларига оид ижтимоий меъёрлар ва кутилмалар таҳлил қилинади.
Хусусан, мамлакатдаги гендер ҳолатининг баҳосида, агар аёллар мамлакат иқтисодий ҳаётида эркаклар билан тенг иштирок эта олса, Ўзбекистон ялпи миллий даромади тахминан 29 фоизга ошиши мумкинлиги қайд этилган. Ушбу фойдаланилмаган иқтисодий салоҳият 700 мингдан ортиқ одамни камбағалликдан олиб чиқиши мумкин.
Жаҳон банки экспертлари мамлакатда гендер тенглигига эришиш учун муҳим ислоҳотлар амалга оширилаётганини қайд этди. Бироқ, тегишли чора-тадбирларнинг самарали ижроси ҳозирча етарлича таъминланмаган.
Ўзбекистон Жаҳон банкининг “Аёллар, бизнес ва қонун” йиллик ҳисоботида энг илғор ўзгаришларни амалга оширган давлатлар қаторига кирганди. Унда Ўзбекистон Сингапур, Туркия ва Бирлашган Араб Амирликлари билан бир хил балл тўплаганди. Шунингдек, Марказий Осиёда энг яхши натижаларни кўрсатди.
Ҳисоботда 190 мамлакатдаги гендер тенглиги билан боғлиқ вазият баҳоланган. Ўзбекистон бошқа 18 та давлатлар қаторида аёллар ҳуқуқларини кенгайтирувчи ҳуқуқий ислоҳотларни амалга оширди.
Ушбу чора-тадбирлар натижасида мамлакат 2022 йил октябрь ойидан буён гендер тенглиги бўйича қонунчиликни такомиллаштиришда энг юқори натижаларга эришган бешта иқтисодиётдан бирига айланди.
Изоҳ (0)