Қашқадарё вилоятининг Шаҳрисабз тумани ва Бухоро шаҳрида истеъмолга яроқсиз алкогол маҳсулотлари муомалага киритилишининг олди олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти ахборот хизмати хабар берди.
Маълум қилинишича, департаментнинг Шаҳрисабз туман бўлими томонидан ИИБ ходимлари билан ҳамкорликда ўтказилган тезкор тадбирда фуқаро З.О. ва бошқалар ноқонуний даромад орттириш мақсадида Шаҳрисабз шаҳри, “Хабарлик” МФЙ ҳудудидаги нотурар бинода алкогол маҳсулотлари ишлаб чиқарувчи цехни ташкил этгани аниқланиб, ушбу яширин цехдан 960 дона қалбаки акциз марка, 15 дона “Парламент” номли қўлбола алкогол маҳсулоти, 180 литр спирт, 1 800 дона “Парламент” номли алкогол қути ва бошқа ишлаб чиқаришда фойдаланилган товар моддий бойликлари ашёвий далил сифатида олинган.
Шу каби, департаментнинг Бухоро шаҳар бўлими томонидан ўтказилган тезкор тадбирда Ғиждувон туманидаги “Ж.Д.” МЧЖ раҳбари Ж.Б. ва бошқалар қўлбола усулда ишлаб чиқарилган 5 турдаги 873 дона қалбаки акциз маркали алкогол маҳсулотини МЧЖ савдо дўконида сотувга қўйгани аниқланиб, ушбу алкогол маҳсулотлари ва 256 қути акциз маркасиз тамаки маҳсулоти ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят иши қўзғатилиб, тергов ҳаракатлари ўтказилмоқда.
Изоҳ (0)