Самарқанд ва Жиззах вилоятларида истеъмолга яроқсиз алкогол маҳсулотлари муомалага киритилишининг олди олинди, деб хабар бермоқда Иқтисодий жиноятларга қарши курашиш департаменти ахборот хизмати.
Хабарга кўра, Бош прокуратура ҳузуридаги департаментнинг Самарқанд вилоят бошқармаси, Ички ишлар бошқармаси, Божхона ва Миллий Гвардия ходимлари ҳамкорлигида ўтказилган тезкор тадбирда “Р.У.” МЧЖ раҳбари И.Э. МЧЖ савдо дўконида ҳеч қандай ҳужжатсиз ҳар хил турдаги жами 12 510 дона алкогол ҳамда 848 қути тамаки маҳсулотини сотувга қўйгани аниқланиб, ушбу маҳсулотлар ашёвий далил сифатида олинган.
Худди шундай, департаментнинг Булунғур туман бўлими, ДХХ ва Ички ишлар бошқармаси ходимлари ҳамкорлигида ўтказилган тезкор тадбирда “О.” МЧЖ раҳбари Ф.Э. МЧЖ савдо дўконида ҳеч қандай ҳужжатсиз ҳар хил турдаги жами 3 855 дона алкогол ва 419 қути тамаки маҳсулотларини сотувга қўйгани аниқланиб, ушбу маҳсулотлар ашёвий далил сифатида олинган.
Департаментнинг Жиззах вилоят бошқармаси ҳамда Ички ишлар бошқармаси ходимлари билан ҳамкорликда ўтказилган тезкор тадбирда эса, “И.Т.” МЧЖга қарашли савдо дўконида ҳеч қандай ҳужжатсиз 9 хил турдаги 693 дона қалбаки акциз маркали истеъмолга яроқсиз алкогол маҳсулотлари сотувга қўйилгани аниқланиб, ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)