Қашқадарё вилоятида истеъмолга яроқсиз алкоголь маҳсулотларини муомалага киритилишининг олди олинди, деб хабар беради Бош прокуратура ҳузуридаги департамент.
Қайд этилишича, департаментнинг Косон туман бўлими томонидан туман ИИБ ходимлари билан ҳамкорликда тезкор тадбир ўтказилган. Тадбирда А.З. исмли шахс ноқонуний даромад орттириш мақсадида Касби тумани “Тинчлик” МФЙ ҳудудида икки нафар фуқарога жами 600 дона “Русская водка” номли истеъмолга яроқсиз ва қалбаки акциз маркали алкоголь маҳсулотини сотган вақтида ашёвий далиллар билан ушланган.
Шу каби, департаментнинг Яккабоғ туман бўлими томонидан ўтказилган тезкор тадбирда “А.” МЧЖ раҳбари А.А. Қамаши тумани “Ўзбекистон” МФЙ ҳудудида харидорга жами 320 дона “Русская водка”, “Не водка”, “Шаҳрисабз” ва “Сабрание” номли истеъмолга яроқсиз ва қалбаки акциз маркали алкоголь маҳсулотини сотган вақтида ашёвий далиллар билан ушланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Аввалроқ Қорақалпоғистон Республикаси ва Хоразм вилоятида истеъмолга яроқсиз алкоголь маҳсулотларини муомалага киритилишининг олди олингани тўғрисида хабар берилганди.
Изоҳ (0)