Norvegiyalik futbolchi Erling Holand 2022-yilda “Barselona”ga o‘tmoqchi bo‘lgan.
Avvalroq kataloniyaliklar “Manchester Siti” hujumchisini 2025-yilda o‘z safiga qo‘shib olishi mumkinligi xabar qilingandi.
“Barselona” allaqachon Holandni o‘z safiga qo‘shib olish uchun harakat qilib ko‘rgan. Robert Levandovski “ko‘k-anorranglilar” futbolchisiga aylanishidan oldin rahbariyat aynan norvegiyalik hujumchining otasi va o‘sha vaqtda uning agenti bo‘lgan Mino Rayola bilan aloqada bo‘lgan. Ular 2021-yilning aprel oyida Barselonaga borgan va klubning loyihasi bilan tanishgan. Shundan so‘ng Madridga borgan va keyin “Manchester Siti” bazasiga tashrif buyurgan. Shuningdek, “Manchester Yunayted”, “Chelsi” va “Liverpul” klublari bazalariga ham borishgan.
2021-yilning yozida Lionel Messi “Barselona”ni tark etgan, ammo Holand “Borussiya D”dan ketmagan. Erling 2022-yilning yozida Kataloniya klubiga o‘tishga rozilik bergan.
2022-yilning mart oyida Xavi Myunxenga uchgan va Holand bilan yuzma-yuz ko‘rishib, loyiha, kelajakdagi rejalar haqida gaplashgan. Biroq, klubning jiddiy moliyaviy muammolari tufayli ushbu transfer amalga oshmagan. Natijada “Barselona” Levandovskiga e’tiborini qaratib, 45+5 million yevroga hujumchini sotib olgan.
O‘sha vaqtdagi muvaffaqiyatsizlikka qaramasdan, “Barselona”ning eshigi Holand uchun har doim ochiq. Fevral oyida klub futbolchining agenti Rafaela Pimentaga yana bir bor taklif bilan chiqqan. Agent “ko‘k-anorranglilar” sport direktori Deku bilan uchrashgan.
Endi kataloniyaliklar 2025-yil yozida Holandni xarid qilishga jiddiy kirishmoqchi.
Eslatib o‘tamiz, joriy mavsumda Holand barcha turnirlarda 34 ta o‘yinda qatnashib, 29 ta gol va 6 ta golli uzatmani amalga oshirdi. Futbolchining klub bilan amaldagi mehnat shartnomasi 2027-yilning yoziga qadar tuzilgan.
Transfermarkt portalida keltirilgan ma’lumotlarga ko‘ra, futbolchining bozor qiymati 180 million yevroni tashkil qiladi.
Izoh (0)