Қўзи, қўчқор, тандир гўшт ва Gentra: “Ташаббусли бюджет”да овоз йиғиш учун нималар таклиф қилинмоқда?

Хабарингиз бор, Ўзбекистонда 2024 йилнинг 16 март кунидан эътиборан “Ташаббусли бюджет”да овоз бериш жараёнлари бошланди. Дастлаб таниш-билишлар орқали илтимосга олинган овозлар, кейинчалик 20-30 минг сўм маблағ эвазига сотила бошланди. Айни кунга келиб эса овозлар анча қимматлади. Жумладан, кимдир 10 та овозга битта қўзи ваъда қилаётган бўлса, бошқаси 50 та овоз учун қўчқор атаган. Яна биров эса 1000 та овоз учун автомобиль совға қилишини айтган. 

“Дарё” журналисти тармоқларда тарқалаётган видеоларни тўплаб, “Ташаббусли бюджет”га овоз бериш нархлари билан қизиқди. 

Тармоқларда тарқалган видеоларнинг бирида қўзичоқ кўтарган фуқаро 10 та овозга битта қўзи беришини айтиб, одамларни овоз беришга чорлагани кўринган.

Аниқлаштирилишича, Фарғона вилоятининг Учкўприк туманидаги Ўрачи қишлоғида яшовчи аҳоли йўлини асфалтлаштириш учун 10 та овозга битта қўзи, 50 та овозга бузоқча, 100 та овозга тойчоқ беришини ваъда қилиб, овоз тўпламоқда.

Telegramъда тарқалган яна бир видеода “Ташаббусли бюджет”га овоз тўплашни мақсад қилганлар фарғоналиклардан фарқли равишда, битта қўзи учун 15 та овоз сўраб, нархни пастлатган. 

Воҳадаги бозорларнинг бирида овоз тўплаётган фуқаро одамларга мурожаат қилиб, битта овоз учун бир лаган ош, 50 минг сўм пул ва колбаса беришини айтиб, жар солаётгани кўринган.

Қашқадарё вилоятининг Китоб туманидаги довонда фаолият юритувчи ошхонада эса 4 та овозга 1 кило тандир гўшт берилиши эълон қилинган.

Кўпчилик эътиборини тортган яна бир видеода Lacetti автомобили эгаси машинасини у айтган лойиҳага 1000 та овоз берганларга совға қилишини айтади. Бироқ автомобиль айнан қайси ҳудуддаги қайси лойиҳага овоз бериш эвазига берилиши номаълум бўлиб қолган. 

“Ташаббусли бюджет”нинг 2024 йилги биринчи мавсумида овоз бериш жараёни 16 март соат 00:00 дан қайта бошланганди. Жараён 4 апрель соат 23:59 гача давом этади.

Ўзбекистонда 13 мартдан “Ташаббусли бюджет”га овоз бериш жараёни бошланиши белгиланган. Бироқ овоз бериш учун зарур платформа – Open budget порталида техник носозлик кузатилган эди. Жорий мавсумда илгари сурилган лойиҳаларни амалга ошириш учун давлат бюджетидан 3 триллион сўм ажратилиши белгиланган. Бунда ҳар бир лойиҳа учун энг юқори қиймат 1 миллиард 360 миллион сўмни ташкил этади.