Намангандаги маҳалла саккизинчи маротаба Open budjet лойиҳасида ғолиб бўлди (видео)

Наманган вилоятининг Норин туманидаги “Учтепа” маҳалласи жорий йилдаги Open budjet лойиҳасининг иккинчи мавсумида ғолиб чиқиб, кўчаларни асфалтлаш учун 1,3 миллиард сўм ютиб олди. Бу ҳақда “Дарё” мухбири Азизбек Абдувалиев хабар бермоқда.

 

Маълум бўлишича, мазкур ютуқ маҳалланинг Open budjet лойиҳаси бошланганидан бери қўлга киритган саккизинчи ғалабаси экан. Бу мамлакатдаги энг яхши натижа эканлиги айтилмоқда.

Олдинги йилларда трансформатор ўрнатиш, кабел тармоғини янгилаш, кўчаларни ободонлаштириш каби турли юмушлар бажарилган. Бу галгиси билан қўшиб ҳисоблаганда маҳалла аҳли жами 9 миллиард сўмдан ортиқ лойиҳаларни амалга оширган.

“Маҳалламизда 5 мингга яқин аҳоли истиқомат қилади. Жуда аҳилмиз, Open budjet каби лойиҳалар бошланиб қолгудек бўлса дарров уюшиб, бирор овозни четга чиқармаймиз. Аксинча, бошқа ҳудудларда ишловчилар овоз суриб келишга ҳаракат қилишади. Ўзимиз ҳам қўл қовуштириб турганимиз йўқ, ҳозир маҳалладаги икки эҳтиёжманд оила учун уй тиклаяпмиз”, — дейди маҳалла фуқаролар йиғини раиси Дилшод Шералиев.

Open budjet лойиҳасидаги навбатдаги ғалабани маҳалла аҳли концерт, дастурхонларга тортилган палов, байрамона безатилган торт ва мушакбозлик билан қарши олди.