Ташаббусли бюджетлаштириш жараёнида овоз беришда соғлом рақобат муҳитини яратиш мақсадида “Бир фуқаро – бир овоз” тизимини жорий этиш кутилмоқда. Бу ҳақда “Ўзбекистон – 2030” стратегиясини “Ёшлар ва бизнесни қўллаб-қувватлаш” йилида амалга ошириш бўйича давлат дастурига оид президент фармони лойиҳасида келтирилган.
Унга кўра, 2024 йил 1 мартдан бошлаб Рақамли ҳукумат лойиҳаларини бошқариш маркази билан ҳамкорликни йўлга қўйиш орқали овоз бериш жараёнида фуқароларни идентификация қилиш йўлга қўйилади. Шу орқали бир фуқаро томонидан берилган битта овозни қабул қилиш тизимини жорий этиш кўзда тутилган.
“Яъни энди номида нечта сим-картаси бўлишидан қатъи назар 1 киши фақат 1 марта овоз бера олади. Масалан, менинг номимда Uzmobile, МобиУз, Ucell ва Beeline рақамлари бор дейлик. Шу пайтгача мен 4 та овоз бера олар эдим. Энди эса фақат 1 марта овоз бераман, кейинги сафар бошқа компания рақамидан яна овоз бермоқчи бўлсам, менга рад жавоби келади. Бу орқали юзлаб сим-карта сотиб олиб, овозлари сонини сунъий кўпайтиришга чек қўйилади”, — дейди Ҳуқуқшунос Хушнудбек Худойбердиев.
Шунингдек, 2024 йил 1 апрелдан бошлаб “Ташаббусли бюджет” доирасидаги лойиҳалар ташаббускорлар, маҳалла раиси ва фаолларининг иш сифати юзасидан розилиги олинганидан кейингина фойдаланишга қабул қилиш тартибини йўлга қўйиш режалаштирилган.
2024 йил 1 августга қадар фуқароларнинг ўзини ўзи бошқариш органларига ташаббусли бюджет бўйича амалга оширилаётган лойиҳалар юзасидан давлат органлари ва ташкилотларидан маълумотлар олиш, маблағларни ўз вақтида ва тўлиқ ажратилишини талаб қилиш ҳамда лойиҳалар амалга оширилишини жамоатчилик томонидан мониторинг қилиш имконияти яратилади.
Изоҳ (0)