Шавкат Мирзиёев Наманган вилояти имкониятларини ишга солиш масалаларига бағишланган йиғилишда аҳоли зичлиги катта бўлган ушбу вилоятда уй-жой қуриш ишларини кенгайтириш зарурлигини айтди.
Йиғилишда шаҳар ва маҳалла инфратузилмасини яхшилаш масалалари ҳам муҳокама қилинган. Икки йил олдин 1 минг 203 гектарда 200 минг аҳоли учун Янги Наманган шаҳри қурилиши бошланганди. Қайд этилишича, жорий босқичда 20 минг хонадонли турар жой, IT Park, меҳмонхона, бизнес маркази, шунингдек, 68 гектарда “Янги Ўзбекистон” боғи қурилиши бошланади.
Шунингдек, Чуст ва Поп туманида 10 минг аҳоли учун “Янги Ўзбекистон” массивлари қурилишига старт берилади.
Президент 2023 йилнинг апрелида ўтказган йиғилишда “Янги Ўзбекистон” массивлари бўйича Фарғонада 80 та, Самарқандда 36 та, Тошкент вилоятида 15 та, Наманганда 14 та уйни фойдаланишга топшириш чўзилиб кетаётганини кўрсатиб ўтганди.
Шу муносабат билан, Бухоро, Қашқадарё, Навоий, Наманган, Самарқанд, Сурхондарё, Сирдарё, Фарғона ва Тошкент вилояти ҳокимларининг қурилиш бўйича ўринбосарлари, Марказий банкнинг вилоят бўлинмалари раҳбарларига ҳайфсан эълон қилинганди.
Изоҳ (0)