“Yangi O‘zbekiston” massivlari bo‘yicha uyni foydalanishga topshirish cho‘zilib ketayotgani sababli bir qator rahbarlarga hayfsan eʼlon qilindi. Bu haqda prezident matbuot kotibi xabar berdi.
Xabarga ko‘ra, 2022-yilda 31 ta “Yangi O‘zbekiston” massivlarini qurish dasturi boshlangan edi. Yig‘ilishda bu boradagi ishlar Andijon va Xorazmda yaxshi ketayotgani taʼkidlanib, Buxoro, Qashqadaryo, Navoiy, Samarqand, Surxondaryo va Sirdaryodagi massivlarda hokimlarning eʼtiborsizligi oqibatida birorta uy foydalanishga topshirilmagani qattiq tanqid qilindi.
“Yangi O‘zbekiston” massivlari bo‘yicha Farg‘onada 80 ta, Samarqandda 36 ta, Toshkent viloyatida 15 ta, Namanganda 14 ta uyni foydalanishga topshirish cho‘zilib ketayotgani ko‘rsatib o‘tildi.
Qayd etilishicha, shu munosabat bilan Buxoro, Qashqadaryo, Navoiy, Namangan, Samarqand, Surxondaryo, Sirdaryo, Farg‘ona va Toshkent viloyati hokimlarining qurilish bo‘yicha o‘rinbosarlari, Markaziy bankning viloyat bo‘linmalari rahbarlariga hayfsan eʼlon qilindi va vaziyatni o‘zgartirish uchun bir oy muhlat berildi.
Shuningdek, 2023-yilda yangi uy-joy qurish hajmini 1,5 baravarga oshirib, 90 mingtaga yetkazish vazifasi qo‘yildi.
Izoh (0)