Москва вилоятида Crocus City Hall’га қилинган ҳужум учун жавобгарликни ИШИД гуруҳи ўз зиммасига олди. BBC нашри бу қанчалик ишончли эканини таҳлил қилди.
Россия томони ҳозирча теракт ортида ким туриши мумкинлиги ҳақида ҳеч қандай расмий версияни илгари сурмади. Россия ташвиқот каналлари ИШИД баёноти сохта эканини айтиб, Украинанинг иштирокига ишора қилди. Украина Ташқи ишлар вазирлиги ва разведка хизматлари ҳужумга алоқадорликларини расман рад этди.
Ҳужум содир бўлган кундан бир кун ўтиб ИШИД янги баёнот билан чиқди ва унда Crocus’да содир бўлган воқеа учун ўз жавобгарлигини яна бир бор таъкидлади. ИШИДга алоқадор деб тахмин қилинган Амак ахборот агентлигининг хабарида ҳужумнинг тўрт нафар иштирокчиси акс этгани фотосурат чоп этилган. Суратда уларнинг юзлари ярим ниқоб билан қопланган ва хиралаштирилган.
Бироқ BBC’нинг экстремистик гуруҳлар бўйича эксперти Мина Ал-Ламийга кўра, бу хабарда ҳужумни қайси минтақавий идора тайёрлагани ва амалга оширгани айтилмаган. Эксперт минтақавий бўлим тилга олинмагани ИШИД учун одатий ҳоллигини айтди. Бу орқали ИШИД ўзининг Россиядаги кичик филиалини Россия хавфсизлик кучларининг диққат-эътиборидан ҳимоя қилишга уринаётган бўлиши ёки минтақавий бўлинма ҳужумда иштирок этмаганини кўрсатиши мумкин.
2024 йил январида ИШИД Эроннинг Кирмон шаҳридаги ҳужумлар учун жавобгарликни ўз зиммасига олганида, ҳужумни амалга оширган минтақавий бўлинма номи ҳам келтирилмаган эди.
Ҳукуматпараст Россия каналлари ҳам ИШИДнинг минтақавий бўлими ҳақида кам гапирилаётганига эътибор қаратди. Уларнинг фикрича, бу гуруҳ баёноти сохта эканини кўрсатади.
Шундай қилиб, Россия Мудофаа вазирлигига яқин бўлган “Рйбар” Telegram-каналида ИШИД Москвадаги теракт учун масъулиятни ўз зиммасига олгани ҳақидаги баёнотлар сохта экани, чунки “бундай хабарлар ИШИД гуруҳлари ёки уларнинг минтақавий филиалларида” мавжуд эмаслиги айтилган.
Аввалроқ Москва вилоятидаги ҳужум “Вилояти Кавказ” ёки “ Вилояти Хуросон” – ИШИДнинг афғон бўлинмаси билан боғлиқ бўлиши мумкинлиги хабар қилинганди. Crocus’га қилинган ҳужум ортида “Вилояти Хуросон” турган бўлиши мумкинлиги ҳақида аввалроқ АҚШ разведка хизматлари хабар қилганди.
Тахминларга кўра, Афғонистон бўлими аъзолари орасида Марказий Осиёдан келган русийзабон муҳожирлар ҳам бўлиши мумкин.
“Crocus’га ҳужумдан олдин ИШИД нинг Россиядаги фаолияти асосан хавфсизлик кучларига яширин ҳужумлар билан чегараланган”, — деб ёзади BBC Мониторинг хизмати журналисти Алекс Шамс Райт.
Райтнинг қайд этишича, қоида тариқасида, ИШИД Россияда ўзининг 2015 йилда ташкил этилган кўзга кўринмас филиали “Вилояти Кавказ” ниқоби остида фаолият юритади. ИШИД ўз зиммасига олган охирги ҳужум Россияда 2020 йилда содир этилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)