Халқаро валюта жамғармаси (ХВЖ) ижрочи директорлари кенгаши Украинага 880 миллион доллар миқдорида навбатдаги кредит улуши ажратиш бўйича келишувларни маъқуллади. Бу ҳақда ХВЖ матбуот хизмати баёнотига таяниб, “ТАСС” хабар берди.
ХВЖ раҳбарияти ташкилот ва Украина раҳбарияти ўртасида аввал эришилган келишувларни кўриб чиқишни якунлаган. Бу Украинага бюджетни қўллаб-қувватлаш учун фойдаланиладиган 880 миллион долларни зудлик билан ажратиш имконини беради, — дейилади матнда.
Украинага навбатдаги транш ажратиш бўйича келишувга февраль ойида эришилган эди. Жамғарма Украина иқтисодиётининг 2024 йилга мўлжалланган ривожланиши прогнози “ўта ноаниқ”лигича қолаётганини тан олган.
Тўрт йиллик кенгайтирилган кредит дастури доирасидаги аввалги 900 миллион долларлик транш ХВЖ томонидан 2023 йил декабрь ойида тасдиқланган. Жамғарма аввалроқ ушбу механизм бўйича Украина учун тўрт йиллик дастурни 15,6 миллиард доллар миқдорида молиялаштиришни тасдиқлаган эди. Украина давлат бюджетининг умумий фондига 2023 йилнинг 3 апрелида 2,7 миллиард долларлик биринчи транш қабул қилинган.
Изоҳ (0)