Татаристон Олий суди қарийб ўн йил қидирилган 39 ёшли Радик Тагировни 30 дан ортиқ кекса аёлларни ўлдирганликда айблаб, умрбод қамоқ жазосига ҳукм қилди. Бу ҳақда “РИА Новости” хабар берди.
Маълумотларга кўра, 2011 йилнинг баҳор ва ёз ойларида Қозон бўйлаб 70 ёшдан 90 ёшгача бўлган ёлғиз кекса аёлларнинг бир қатор қотилликлари содир бўлган. Номаълум шахс хонадонларга кириб, уй бекаларини бўғиб ўлдирган, пулларни ўғирлаб, ғойиб бўлган. Деярли барча ҳужумлар эски Хрушчёв биноларида содир бўлган.
Мўжизавий тарзда омон қолган жабрланганлардан бири тахминий эскизни яратишга ёрдам берган. “Ўрта бўйли ва ўрта ёшли эркак”. Масъуллар илгари шу каби жиноятлар учун судланганларнинг барчасини текширган, аммо бу ҳеч қандай натижа бермаган.
Уни қидириш учун тузилган махсус гуруҳнинг аниқлашича, жиноятчи хонадонларга ижтимоий ходим, газ хизмати ходими ёки уй-жой коммунал хизматчиси ниқоби остида кириб келган. У одамларнинг ишончини жуда осон қозонган. Махсус гуруҳ қурбонларнинг буюмларида номаълум шахснинг генотипини аниқлаган. Маълумотлар базасида ўхшаш ДНК намуналари мавжуд бўлмаган.
2012 йил октябрь ойида қотилликлар тўхташига қарамай, тергов давом этган. Бир неча йил давомида минглаб эркаклар, жумладан, маҳбуслардан ДНК олинган. Қотил ижтимоий ишчи ёки ёлғиз нафақахўрлар рўйхатига кириш ҳуқуқига эга бўлган шахс экани тахмин қилинган. У ҳақдаги ҳар қандай ишончли маълумот учун уч миллион рубль мукофот эълон қилинган.
2017 йилнинг март ойида Самарада уч нафар пенсионер бирин-кетин ўлдирилган. Қозоғистонда туғилган 37 ёшли Павел Шаяхметов гумонланувчи сифатида қўлга олинган. Шаяхметов жиноятларни тан олган. Бироқ суд мажлисида у қандайдир моддалар таъсирида кўрсатма берганини айтган. У тергов изоляторида ўз жонига қасд қилганидан сўнг, жиноят иши тўхтатилган.
Бир неча йил аввал қозонликлардан бири полицияга 35 ёшли ўғли Радик Тагиров бедарак йўқолгани ҳақида ариза берган. Улар қидирув ишини очиб, аёлни ДНК тестини топширишга юборган. Генотип “Волга маняги” билан қондош эканлигини кўрсатган. Тагиров федерал қидирувга берилган ва 2020 йил декабрь ойида Татаристон пойтахтидан унча узоқ бўлмаган қишлоқда ҳибсга олинган. Маълум бўлишича, 2000 йилларнинг ўрталари ва охирида у икки марта қурол сақлаш ва ўғрилик учун судланган. У биринчи сўроқда айбига иқрор бўлган, жиноятларини ўзининг оғир молиявий аҳволи билан изоҳлаган. Суд-психиатрия экспертизаси унинг ақли расо эканлигини тасдиқлаган.
Тагиров 30 та қотиллик ва бошқа бир қатор жиноятларда айбланган. 2022 йил охирида жиноий иш Татаристон Олий судига топширилган. Эртаси куни судланувчи ўзининг айбсизлигини айтган.
Менинг иқрорларим фақат таҳдид остида олинган ва рухсат этилмаган тергов усуллари натижасидир. Буларнинг барчасини ҳукмда инобатга олишингизни ва мен қилмаган ваҳшийлик учун ҳукм чиқармаслигингизни сўрайман, — деди у жараён иштирокчиларига.
Унинг сўзларига кўра, Уфа, Иваново ва Пермда содир этилган жиноятларда унинг ДНКси аниқланмаган ва баъзи ҳолларда олинган генотип бир вақтнинг ўзида бир нечта одамга тегишли бўлган. Тагиров, шунингдек, аксар далиллар тўғри ўрганилмаганини ҳамда тергов унинг маълум вақтларда жиноят содир бўлган жойда бўлганини тасдиқловчи маълумотларни тақдим этмаганини айтган.
Изоҳ (0)