Германиянинг Дессау шаҳрида яшовчи 47 ёшли В.Грит исмли аёл сўнгги 30 йил давомида дўконлардан ўғирлаган товарлар билан бутун квартираси ва ертўласини тўлдирган. Мазкур аёл устидан суд бошланди, дея Bild хабар берди.
У ўғирланган буюмларни 1700 та қути, сумка ва қопларда сақлаган, уларнинг умумий оғирлиги 20 тоннадан ортиқни ташкил қилган. Дастлабки ҳисоб-китобларга кўра, ўғирланган барча ашёларнинг қиймати деярли ярим миллион еврони ташкил қилади.
В.Грит ҳатто ўғирланган нарсаларнинг аксариятини қадоқдан олиб ташламаган. Унинг уйидан топилган буюмларни олиб кетиш учун полиция чақирган юк машинаси бир неча марта қатнашига тўғри келган.
Прокуратура В.Гритнинг ҳаракатларида 141 та жиноий ҳуқуқбузарликни аниқлаган. Аёл асбоб-ускуналар, кийим-кечак, ўйинчоқлар, чангютгичлар, дори-дармонлар ва ҳатто уруғларни ўғирлаган. Гритнинг биринчи жиноятлари 2019 йилда, DIY дўкони 1000 евродан ортиқ қийматдаги товарлар ўғирлангани ҳақида ариза берганида маълум бўлган.
Айбланувчи ёлғиз яшайди, унинг на эри, на болалари бор. Шу билан бирга, Грит ҳеч қачон ўғирланган нарсаларни қайта сотишга уринмаган, уларни квартирада ва ертўлада сақлаган. Дастлабки тиббий текширувга кўра, аёл патологик обсессиф-компулсив бузилишдан (психологик касаллик тури) азият чекади. Суд айбланувчини ихтисослаштирилган психиатрия муассасасига юбориш масаласини кўриб чиқмоқда.
Изоҳ (0)