Ички ишлар вазирлиги “Фойдаланишда бўлган мопед ёки скутерларни давлат рўйхатидан ўтказиш бўйича вақтинчалик низомни тасдиқлаш ҳақида”ги Вазирлар Маҳкамаси қарори лойиҳасини муҳокамага қўйди.
Ҳужжат лойиҳасига мувофиқ 2024 йил 1 июлдан бошлаб:
- автомототранспорт воситаларини давлат рўйхатидан ўтказиш ва уларга рўйхатдан ўтказиш давлат рақами белгиларини бериш билан боғлиқ мурожаатларни Йўл ҳаракати хавфсизлиги хизматининг мобил иловаси, веб-сайти, Call маркази ёки Ягона интерактив давлат хизматлари портали орқали юбориш ва тўловларни онлайн амалга ошириш;
- рўйхатдан ўтказиш давлат рақами белгиларини Йўл ҳаракати хавфсизлиги хизматининг Ягона автоматлаштирилган ахборот тизимидаги “Давлат рақам белгилари” модулида автоматик тарзда тасодифий танлаш йўли билан бериш тартиблари жорий этилади.
Двигательининг иш ҳажми 25 см3 ва ундан ортиқ, лекин 50 см3 дан ошмайдиган, шунингдек, электродвигателининг қуввати 0,25 киловатт ва ундан ортиқ, лекин 4 киловаттдан ошмайдиган, конструктив тезлиги соатига 25 километр ва ундан ортиқ, лекин 50 километрдан ошмайдиган транспорт воситалари (мопед ва скутер) учун алоҳида рўйхатдан ўтказиш давлат рақами белгилари жорий этилади ва 2024 йил 1 июлдан бошлаб бу турдаги янги транспорт воситалари умумий тартибда, фойдаланишда бўлганлари вақтинчалик низом асосида давлат рўйхатидан ўтказилади.
Шунингдек, 2024 йил 1 июлга қадар мопед ва скутерларни сотиш фаолияти билан шуғулланувчи махсус савдо ташкилотлар (ишлаб чиқарувчи, унинг вакили ёки воситачи (дистрибюторлик, дилерлик) ташкилотлари) Йўл ҳаракати хавфсизлиги хизматининг Ягона автоматлаштирилган ахборот тизими “Транспорт воситалари ҳисоб маълумотномалари” модулига интеграция қилининади ва бундай транспорт воситалари учун ҳисоб-маълумотларни электрон шаклда берилишини таъминланади.
2025 йил 1 январдан бошлаб рўйхатга олинмаган бу турдаги транспорт воситаларидан фойдаланиш амалдаги қонунчилик талаблари асосида тақиқланади.
2023 йилнинг апрель бошларида Макроиқтисодий ва ҳудудий тадқиқотлар институти Ўзбекистонда электросамокатларда ҳаракатланишни чеклашни таклиф этганди. Таъкидланишича, мамлакатда мазкур транспорт воситаларининг бетартиб ҳаракатланиши пиёдалар, велосипедчи ва автомашиналар учун қатор муаммоларни юзага келтирмоқда.
Изоҳ (0)