Шавкат Мирзиёевнинг Наврўз умумхалқ байрамига бағишланган тантанали маросимдаги нутқида шахмат гроссмейстери – Нодирбек Абдусатторов Прага халқаро турнирида муддатидан олдин ғалаба қозониб, жаҳондаги энг кучли тўртта шахматчининг бирига айланганини эътироф этди.
“Келинглар, шу улуғ айём кунда барчамиз астойдил ният қилайлик: Нодирбекка тез кунларда Ватанимизга жаҳон шахмат тожини олиб келиш насиб эцин! Сен бунга, албатта, қодирсан, Нодирбек ўғлим! Бутун эл-юртимиз сендан шу буюк ғалабани кутмоқда”, — деди президент.
Давлат раҳбари бундай юксак марраларни забт этишда қизлар ҳам ўғлонлардан қолишмаётганини таъкидлади. Хусусан, Зайнаб Дайибекова қиличбозлик бўйича Перуда бўлиб ўтган жаҳон кубоги ўйинларида Ўзбекистон спорти тарихида биринчи марта бронза медалини қўлга киритди. Шаҳина Йигиталиева эса Параосиё ўйинларида найза отиш бўйича олтин медалга сазовор бўлиб, мазкур мусобақалар рекордини янгилади.
“Азиз спортчи фарзандларим, сизларни олдинда ғоят муҳим ва улкан синов – Париж Олимпиадаси ва Паралимпия ўйинлари кутмоқда. Жаҳоннинг энг зўр спортчилари беллашадиган ана шу мусобақаларда Ўзбекистон байроғини баланд кўтариб, юртимизга қўша-қўша медаллар, ютуқ ва совринлар олиб келасиз, деб ишонаман”, — деди Шавкат Мирзиёев.
Президент мамлакат спортчилари ўтган йили Осиё ўйинларида 22 та олтин, 18 та кумуш, 31 та бронза медалини қўлга киритиб, Ўзбекистоннинг ушбу мусобақалардаги рекордини янгилаганини ҳам қайд этиб ўтди.
Изоҳ (0)