Коллектив Хавфсизлик Шартномаси Ташкилоти (КХШТ) 12—13 март кунлари стратегик қўмондонлик-штаб ўқув машғулотларини ўтказади. Унда инқироз хавфи ортиб бораётган бир шароитда Марказий Осиё минтақасида вазиятни барқарорлаштириш масалалари ишлаб чиқилади. Бу ҳақда “ТАСС” хабар берди.
Машғулотлар Бирлашган штаб бошлиғи, генерал-полковник Андрей Сердюков бошчилигида ўтказилмоқда. Бу кузда Қозоғистонда бўлиб ўтадиган “Бузилмас биродарлик—2024” қўмондонлик-штаб ўқув машғулотларига тайёргарлик кўриш учун муҳим воқеадир.
Ўқув машғулотларини ўтказиш учун ҳарбий-сиёсий ва стратегик тайёргарлик муҳити яратилган бўлиб, унинг доирасида бир қатор конвенциялар қабул қилинган, давлатлар ва халқаро ташкилотларнинг номлари ўзгартирилган. Вазиятга кўра, КХШТ масъул бўлган зонада потенциал таҳдидларни кучайтирувчи вариантлардан бири моделлаштирилган ва Марказий Осиёда шартли ҳолатда инқирозли вазиятнинг пайдо бўлиши кўзда тутилган, — дейди у.
Тадбирда КХШТ бош котиби Имангали Тасмагамбетов машғулотлар “оғир халқаро вазиятда ўтказилаётгани”ни айтди.
Дунёнинг турли минтақаларида эски конфликтлар кучаймоқда ва янги кескинлик ўчоқлари, жумладан КХШТ масъул бўлган ҳудудда ҳам қўзғатилмоқда. Замонавий инқирозлар тобора гибрид хусусият касб этмоқда ва уларни ҳал қилиш комплекс ёндашувларни талаб қилади, — дейди у.
Изоҳ (0)