Фарғонада Telegram орқали зарарли дастурлар тарқатиб келган ҳакер йигит қўлга олинди. Бу ҳақда ИИВ Киберхавфсизлик маркази хабар берди.
Маълум қилинишича, Киберхавфсизлик маркази ходимлари ҳамда Фарғона вилояти Киберхавфсизлик бўлими ходимлари билан ҳамкорликда тезкор-қидирув ва техник тадбирлар олиб борилган. Тадбирлар давомида Қўштепа туманида яшовчи 18 ёшли М.А. исмли шахс Telegram мессенжерида Cyber Education номли каналга компьютер тизимига зарар етказиши мумкин бўлган турли хил дастурларни жойлаштириш орқали тарқатиб келгани аниқланиб, тегишли тартибда расмийлаштирилиб олинди.
Мазкур ҳолат юзасидан М.А.га нисбатан Жиноят кодексининг 278-6-моддаси (зарар келтирувчи дастурларни яратиш, ишлатиш ёки тарқатиш) 1-қисми билан жиноят иши қўзғатилиб, тергов ҳаракатлари давом эттирилмоқда
Қонунчиликка мувофиқ, бундай жиноий хатти-ҳаракатлар учун базавий ҳисоблаш миқдорининг юз бараваридан 300 бараваригача миқдорда жарима ёки икки йилгача озодликни чеклаш ёхуд 2 йилгача озодликдан маҳрум қилиш жазоси қўлланилиши мумкин.
Аввалроқ Бухоро вилоятида аёлнинг фотосуратларига махсус дастур ёрдамида қайта ишлов бериб, тарқатиш билан қўрқитиб, пул талаб қилган шахс қўлга олингани тўғрисида хабар берилганди.
Изоҳ (0)