Ўзбекистонда ижро этувчи ҳокимият органлари фаолияти самарадорлигини баҳолаш тизими такомиллаштирилади.
“Республика ва маҳаллий ижро этувчи ҳокимият органлари ҳамда хўжалик бирлашмалари фаолияти самарадорлигини баҳолаш тизимини такомиллаштириш чора-тадбирлари тўғрисида” президент фармони қабул қилинди.
Унга мувофиқ, республика ижро этувчи ҳокимият органлари ва хўжалик бирлашмалари раҳбарлари ва уларнинг ўринбосарлари фаолиятининг энг муҳим самарадорлик кўрсаткичлари (КРИ), уларга эришиш бўйича “йўл хариталари” ҳамда улар томонидан ҳудудларда амалга ошириладиган чора-тадбирлар дастури ҳукумат томонидан тасдиқланади.
Самарадорлик кўрсаткичлари бажарилиши тўғрисидаги маълумот ҳар чоракда “самарадорлик.уз” электрон платформасига киритилади ҳамда унда раҳбарлар ва уларнинг ўринбосарлари фаолиятининг самарадорлиги рейтинги шаклланади.
Ҳар бир самарадорлик кўрсаткичига белгиланадиган салмоқ ўлчови йиғиндисидан келиб чиқиб, самарадорлик кўрсаткичлари улар бажарилиши қуйидагича баҳоланади:
- 70 фоиздан кам бўлганда – “қониқарсиз”,
- 70 фоиздан 85 фоизгача – “қониқарли”,
- 85 фоиздан 100 фоизгача – “яхши”
- 100 фоиз ва ундан юқори бўлганда “аъло”.
Республика ижро этувчи ҳокимият органлари, хўжалик бирлашмалари раҳбари ва уларнинг ўринбосарларини рағбатлантириш тўловлари миқдори уларнинг самарадорлик кўрсаткичларини баҳолаш натижаларидан келиб чиқиб белгиланади.
Чорак якуни бўйича самарадорлик кўрсаткичларига эришиш натижалари “қониқарсиз” деб баҳоланган раҳбарлар ва уларнинг ўринбосарларига рағбатлантириш тўловлари келгуси 3 ой учун тўхтатилади ва уларга нисбатан интизомий таъсир чораларини қўллаш масаласи кўриб чиқилади. Бунда ҳукумат раёсатида самарадорлик кўрсаткичлари асослантирилган сабабларга кўра бажарилмагани тасдиқланган ҳоллар мустасно.
Йил якуни бўйича самарадорлик кўрсаткичларига эришиш натижалари “қониқарсиз” деб баҳоланган раҳбарлар ва уларнинг ўринбосарларига нисбатан уларнинг эгаллаб турган лавозимига лойиқлиги масаласи кўриб чиқилади.
Изоҳ (0)