“Очиқ бюджет” порталида техник носозликлар кузатилаётгани хабар қилинганди. Мазкур муаммо сабаб “Ташаббусли бюджет”га овоз бериш жараёни кечиктирилмоқда.
Иқтисодиёт ва молия вазирлиги “Ташаббусли бюджет”га овоз бериш жараёни 16 мартдан бошлаб давом эттирилишини маълум қилди.
“Очиқ бюджет” портали ишида айрим техник носозликлар кузатилаётгани сабабли портал фаолиятида узилишлар бўлмоқда. Носозликларни тўлиқ бартараф этиш мақсадида овоз бериш жараёнлари вақтинча тўхтатилади ва 16 март соат 00:00 дан бошлаб давом эттирилади. Айни вақтда мутахассислар томонидан камчиликларни бартараф этиш бўйича зарур чоралар кўрилмоқда, —дея ҳолатни изоҳлаган вазирлик.
Аввалроқ “Ташаббусли бюджет”га овоз беришнинг 2024 йилдаги 1-мавсуми 13 мартдан 1 апрелга қадар давом этиши хабар қилинганди. Фуқаролар “Очиқ бюджет” портали орқали ёки порталнинг мобил иловасида танлаган лойиҳаларига овоз беришлари мумкин бўлади.
Жорий мавсумда илгари сурилган лойиҳаларни амалга ошириш учун давлат бюджетидан 3 триллион сўм ажратилиши белгиланган. Бунда ҳар бир лойиҳа учун энг юқори қиймат 1 миллиард 360 миллион сўмни ташкил этади.
Ҳозиргача порталга 9 443 та маҳалла фуқаролар йиғинидан 35 575 та ташаббус келиб тушган бўлиб, шундан 28 919 таси маъқулланган. Бу галги мавсумдан бошлаб овоз бериш жараёнига “Бир фуқаро, бир овоз” тамойили жорий этилди.
Изоҳ (0)