Сирдарё вилоятидаги каналларнинг биридан Хўжандда бир ой олдин йўқолган 9 ёшли қиз Сафияхон Раҳматованинг жасади топилди. Бу ҳақда AsiaPlus хабар берди.
Тожикистон Фавқулодда вазиятлар ва фуқаролик мудофааси қўмитаси Ўзбекистон Фавқулодда вазиятлар вазирлигидан қизни топишда ёрдам сўраган. Қидирув натижалари тўғрисидаги расмий хат Тожикистон Фавқулодда вазиятлар комиссияси раҳбари Рустам Назарзодага Ўзбекистон Фавқулодда вазиятлар вазири Абдулла Қўлдошевдан юборилган.
Хатда Тожикистон томонининг сўровига асосан жорий йилнинг 2-12 март кунлари Ўзбекистон Фавқулодда вазиятлар вазирлигининг ғаввос-қутқарув хизмати Сирдарёда қидирув ишларини олиб боргани ёзилган. Текширувга Сирдарё вилояти Ширин шаҳри яқинидаги қишлоқлар аҳолиси ҳам жалб қилинган.
“Олиб борилган қидирув ишлари натижасида қизнинг жасади 12 март куни соат 15:15 да Сирдарё вилояти Ширин шаҳри ҳудудидан оқиб ўтувчи Жанубий Мирзачўл каналининг ўнг қирғоғидан топилди”, — дейилади хатда.
Ҳозирда Ўзбекистон қонунчилигига мувофиқ қизнинг жасади Сирдарё вилоятининг Боёвут туманидаги тиббиёт муассасаси ўликхонасига топширилган, кейин қариндошларига берилади.
Чўкиб кетган қиз жасади Ўзбекистон ҳудудидан топилгани ҳақидаги маълумотни Фавқулодда вазиятлар комиссиясининг Хўжанд бўлими бошлиғи Мирзораҳим Абдуллоев ҳам тасдиқлаган.
Сафияхон Раҳматова 2024 йил 7 февраль куни Хўжандда ғойиб бўлган. Уни охирги марта Сирдарё соҳилидаги Камоли Хўжанди боғи яқинидаги Раҳмон Набиев кўчасидан олинган видеода кўришган.
Унинг уйи шу ҳудудда жойлашган. Видеода қизнинг йўл бўйлаб югуриб, дарё қирғоғига тушганини кўриш мумкин. Шундан сўнг қиз бедарак йўқолган.
Февраль ойи давомида йўқолган қизнинг жасадини қидириш ишлари Хўжанд ва Суғд вилояти фавқулодда штаблари томонидан олиб борилган. Шаҳар ва туман бошқармаларининг тезкор отрядидан ғаввослар жалб қилинган. Уни нафақат Фавқулодда вазиятлар комиссияси ғаввослари, балки кўнгиллилар ва Хўжанд шаҳрининг аҳолиси ҳам қидирган.
Фавқулодда вазиятлар комиссияси етарли далиллар йўқлиги сабабли қиз дарёга чўкиб кетмаган бўлиши мумкинлигини тахмин қилганига қарамай, қизнинг ота-онаси унинг чўкиб кетганига ишонч ҳосил қилган.
Изоҳ (0)