Sirdaryo viloyatidagi kanallarning biridan Xo‘jandda bir oy oldin yo‘qolgan 9 yoshli qiz Safiyaxon Rahmatovaning jasadi topildi. Bu haqda AsiaPlus xabar berdi.
Tojikiston Favqulodda vaziyatlar va fuqarolik mudofaasi qo‘mitasi O‘zbekiston Favqulodda vaziyatlar vazirligidan qizni topishda yordam so‘ragan. Qidiruv natijalari to‘g‘risidagi rasmiy xat Tojikiston Favqulodda vaziyatlar komissiyasi rahbari Rustam Nazarzodaga O‘zbekiston Favqulodda vaziyatlar vaziri Abdulla Qo‘ldoshevdan yuborilgan.
Xatda Tojikiston tomonining so‘roviga asosan joriy yilning 2-12 mart kunlari O‘zbekiston Favqulodda vaziyatlar vazirligining g‘avvos-qutqaruv xizmati Sirdaryoda qidiruv ishlarini olib borgani yozilgan. Tekshiruvga Sirdaryo viloyati Shirin shahri yaqinidagi qishloqlar aholisi ham jalb qilingan.
“Olib borilgan qidiruv ishlari natijasida qizning jasadi 12-mart kuni soat 15:15 da Sirdaryo viloyati Shirin shahri hududidan oqib o‘tuvchi Janubiy Mirzacho‘l kanalining o‘ng qirg‘og‘idan topildi”, — deyiladi xatda.
Hozirda O‘zbekiston qonunchiligiga muvofiq qizning jasadi Sirdaryo viloyatining Boyovut tumanidagi tibbiyot muassasasi o‘likxonasiga topshirilgan, keyin qarindoshlariga beriladi.
Cho‘kib ketgan qiz jasadi O‘zbekiston hududidan topilgani haqidagi maʼlumotni Favqulodda vaziyatlar komissiyasining Xo‘jand bo‘limi boshlig‘i Mirzorahim Abdulloyev ham tasdiqlagan.
Safiyaxon Rahmatova 2024-yil 7-fevral kuni Xo‘jandda g‘oyib bo‘lgan. Uni oxirgi marta Sirdaryo sohilidagi Kamoli Xo‘jandi bog‘i yaqinidagi Rahmon Nabiyev ko‘chasidan olingan videoda ko‘rishgan.
Uning uyi shu hududda joylashgan. Videoda qizning yo‘l bo‘ylab yugurib, daryo qirg‘og‘iga tushganini ko‘rish mumkin. Shundan so‘ng qiz bedarak yo‘qolgan.
Fevral oyi davomida yo‘qolgan qizning jasadini qidirish ishlari Xo‘jand va Sug‘d viloyati favqulodda shtablari tomonidan olib borilgan. Shahar va tuman boshqarmalarining tezkor otryadidan g‘avvoslar jalb qilingan. Uni nafaqat Favqulodda vaziyatlar komissiyasi g‘avvoslari, balki ko‘ngillilar va Xo‘jand shahrining aholisi ham qidirgan.
Favqulodda vaziyatlar komissiyasi yetarli dalillar yo‘qligi sababli qiz daryoga cho‘kib ketmagan bo‘lishi mumkinligini taxmin qilganiga qaramay, qizning ota-onasi uning cho‘kib ketganiga ishonch hosil qilgan.
Izoh (0)