Қозоғистон ва Тожикистонда муқаддас рамазон ойи 11 мартдан бошланади. Икки давлатнинг диний бошқармалари рамазон тақвими ва садақа миқдорини эълон қилди.
Қозоғистон мусулмонлари диний бошқармасининг шариат ва фатво бўлими Туркия, Озарбайжон, Ўзбекистон, Қирғизистон давлатлари олимлар кенгаши ва фатволар беришга масъул олимлар билан маслаҳатлашувлардан сўнг 11 мартни рамазон ойи бошланиши сифатида тасдиқлади.
“Умумий фатвога кўра, рамазон ойи 11 мартдан бошланади. 5 апрелдан 6 апрелга ўтар кечаси эса қадр кечаси ҳисобланади. 10 апрель Ҳайит байрамидир”, — дейди Қозоғистон мусулмонлари диний бошқармаси.
Фитр садақаси Қозоғистон бўйича ўртача 2 килограм уннинг ўртача нархидан келиб чиқиб, 640 тенге (салкам 18 минг сўм) миқдорида маъқулланди. Шунингдек, Остона, Олмаота ва Чимкент учун рамазон тақвими ҳам эълон қилинди.
Тожикистонда муборак рамазон ойи жорий йилнинг 11 мартидан бошланади. Тожикистон Дин қўмитаси рамазон тақвимини эълон қилди. Мамлакат Уламолар кенгаши Тожикистон Миллий фанлар академияси Астрофизика институти хулосаси асосида муборак ой санасини белгилади.
Кенгаш, шунингдек, фитра садақаси (муқаддас рўза вақтидаги садақа) миқдорини ҳам эълон қилди — 7 сомоний (тахминан 8 минг сўм).
Бу йил закот 880 сомонийдан (1 миллион сўмдан зиёд) бошланади. Закотни қўшимча маблағи, яъни камида 35 275 сомонийси (тахминан 40 миллион 324 минг сўм) бўлган мўминлар бериши керак.
Рўза тутишга қодир бўлмаганлар ёки муборак ойда тутмаган рўза кунлари учун фидия – 30 кунлик (кунига 14 сомоний – 16 минг сўм) 420 сомоний (480 минг сўмдан зиёд).
Юқоридаги суммалар 5 март кунги курс бўйича сўмга конвертация қилинди.
Изоҳ (0)