Ўзбекистонда 8 турдаги қалбакилаштирилган фармацевтика маҳсулотлари аниқланди

Ўзбекистонда февраль ойида 8 турдаги 1498 ўрам қалбакилаштирилган фармацевтика маҳсулотлари аниқланди. Бу ҳақда Фармацевтика маҳсулотлари хавфсизлиги маркази хабар берди.

Маълум қилинишича, жорий йилнинг февраль ойида ҳуқуқни муҳофаза қилиш органлари томонидан Фармацевтика маҳсулотлари хавфсизлиги марказига тезкор тадбирларда олинган фармацевтика маҳсулотларини экпертизадан ўтказиш бўйича 206 та мурожаат келиб тушди. Тақдим қилинган дори воситалари ва тиббий буюмлар ўрнатилган тартибда лаборатория текширувидан ўтказилганда, таҳлиллар натижаларига кўра, ноқонуний муомалада бўлган:

• 5958 ўрам — давлат рўйхатидан ўтган ва мувофиқлик сертификати мавжуд;
• 4505 ўрам — давлат рўйхатидан ўтмаган ва мувофиқлик сертификати мавжуд бўлмаган;
• 300 ўрам — ёрлиқлаш кўрсаткичи бўйича номувофиқ (контрафакт);
• 726 ўрам — яроқлилик муддати тугаган (сифатсиз);
• 1498 ўрам — қалбакилаштирилган;

умумий 12 987 ўрам фармацевтика маҳсулотларининг тиббиёт амалиётида қўллаш мумкин эмаслиги юзасидан хулоса берилди. Ҳамда ушбу сифатсиз, қалбакилаштирилган ва Ўзбекистонга ноқонуний кириб келган фармацевтика маҳсулотлари айланмасининг олди олинди.