Литвада номаълум шахс коррупцияга қарши кураш фонди собиқ раиси, марҳум Алексей Навальнийнинг шериги Леонид Волковга ҳужум қилди. Бу ҳақда BBC хабар берди.
Жабрланувчининг айтишича, унинг оёқлари ва қўлларига болға билан зарба беришган. Маълумотни Навальнийнинг матбуот котиби Кира Ярмиш ҳам тасдиқлаган.
“Леонид Волковга ҳозиргина уйи яқинида ҳужум қилишди. Унинг машинасининг ойнасини синдиришган ва кўзига ёш оқизувчи газ сепишган, шундан сўнг номаълум шахс Леонидни болға билан ура бошлаган. Ҳозир Леонид уйида, полиция ва тез ёрдам келмоқда”, — деб ёзган Ярмиш Х ижтимоий тармоғида.
Коррупцияга қарши кураш фонди директори Иван Жданов бу хабарни тасдиқлаган. Волковнинг ўзи ҳам ҳодисага муносабат билдирган.
“Бир киши уйимнинг олдида болға билан оёғимга 15 марта урди. Оёқ бутунлигича қолди — юриш оғриқли, лекин синиш йўқлигини айтишди, аммо қўлимни синдиришди. Ҳозирча ҳеч қандай изоҳ беришга тайёр эмасман”, — деди у.
Литва ташқи ишлар вазири Габриэлиус Гандсбергис ҳам воқеага изоҳ берди.
“Леонидга қилинган ҳужум ҳақидаги хабар ҳайратланарли. Тегишли органлар иш бошлади. Жиноятчилар ўз жиноятлари учун жавоб беришлари керак”, — деди Гандсбергис.
Изоҳ (0)